“Mari Alkatiri: TL Tenki Kaer Rasik Politika, Ho Ajudus ONU”

.

Jornal INDEPENDENTE - Kuarta, 01 Fevereiru 2012

Lider opozisaun husi Partidu FRETILIN, Mari Alkatiri hateten Timor Leste tenke kaer rasik politika no planu hodi dezenvolve nasaun ne’e, bainhira mandatu UNMIT remata iha fulan-Dezembru 2012.

Eis primeiru Ministru ne’e hateten kestaun ne’e ba jornalista sira, hafoin hasoru malu ho delegasaun husi Organizasaun nasoens Unidas (ONU) liu husi UNMIT, iha Comite Central FRETILIN.

Iha hasoru malu ne’e, Lideransa FRETILIN ne’ebe sempre halo istoria iha situasaun saida de’it hodi hametin paz no estabilidade ne’e, husu ba parte ONU atu kontinua reforsa liu tan relasaun ho Timor-Leste iha seitor dezenvolvimentu Nasional, liu husi nia parseiru ajensia hanesan, UNDP, UNICEF, UNESCO, FAO no seluk tan hodi aselera diak liu tan dezenvolvimentu.

“Maibe ita labele haksoit derepente husi Peace Build keeping ba Development, entaun presija defini didiak hodi kontinua hetan ajuda ba dezenvolvimentu no paz ho estabilidade,” dehan Alkatiri.

Nia deha tan, kuandu dezenvolvimentu la lao, paz no estabilidade mos sei la akontese, ne’e duni importante tebes hodi hadia kapasidade no manajementu ba osan ne’ebe TL rasik iha.

“Ezemplu deit tinan hat resin, ita fakar osan barak maibe rejultadu laiha, tenke halo jestaun maka’as ba aspeitu hotu,” deklara eis PM ne’e.

Tan ne’e, Eis Primeiru Ministru ne’e husu atu, ho situasaun politika ne’ebe TL sei hasoru iha eleisaun jeral oin mai, liuliu eleisaun Presidensial atu kandidata ida-idak tenke garante no asegura estabilidade no lao tuir knar saida mak konsagra ona iha konstituisaun RDTL.

Maibe, buat hirak ne’e hotu, Sekjer FRETILIN ne’e dehan, ONU labele sai inan ba ida ba TL bainhira remata nia mandatu, Timor Leste sai fali oan kak ida.

“Ital abele senti situasaun ne’e hanesan oan kiak, ita maka tenki ka’er rasik kuda talin, maibe ho sira nia ajuda,” tenik Mari.

Objetivu delegasaun iha Timor Leste ne’e, atu halo avaliasaun ba situasaun no kondisaun real durante iha nia misaun, Nomos saida mak ONU presiza atu ajuda nafatin ba Timor-Leste.

.