“Lu-Olo Sei La Ataka KAPREZ Seluk”

.

Jornal Timor Post - Sabadu, 04 Fevereiru 2012

Kandidatu Prezidenti Republika, Francisco Guterres “Lu-Olo” kompromete sei kumpri regulamentu husi CNE hodi la halo ataka no hatun kandidatu sira seluk iha nia kampania maibe sei hato’o de’it nia programa ba povu.

“Hau hanoin kandidatu hotu-hotu tenki kumprimisiu ida ne’ebe Komisaun Nasional Eleisaun (CNE) prepara para labele ataka malu, labele hatun malu, labele asa’e malu maibe ida-idak ba koalia de’it konaba nia komprimisiu,” Lu-Olo dehan ba Timor Post iha Tribunal Rekursu, Caikoli, Dili, foin lalais ne’e.

Kandidatu Prezidenti Republika (KAPREZ) husi Partidu FRETILIN ne’e konfesa katak, wainhira iha kampania nia sei buka atu hato’o programa ne’ebe nia sei halo, tuir nia kompetensia Prezidenti no sei la halo promete ba povu konaba buat ne’ebe mak la’os kompetensia Prezidenti nian, inklui mos sei la halo ataka ida ba kandidatu Prezidenti seluk.

Kandidatu husi partidu FRETILIN ne’e mos hateten nia pronto kompete kandidatu sira ne’ebe iha no lakohi halo uluk prediksaun katak, nia sei avansa to’o iha segundu ronde ka la’e, maibe ba votasaun mak hare.

Entertantu, wainhira husu kona ba militante FRETILIN barak ne’ebe fo apoiu ba kandidatu Taur Matan Ruak, Lu-Olo hatan katak, los duni iha militante balun mak fo sira nia apoiu ba kandidatu sira seluk, tamba iha momentu ne’ebe nia seidauk deklara nia kandidatu ba prezidenti, maibe wainhira nia deklara tiha nia kandidatura, militante hirak ne’e halai fila hodi fo sira nia apoiu ba nia.

“Hau hanoin los duni, militante balun halai ba fo sira nia apoiu ba kandidatu seluk, maibe, ne’e la’os militante hotu, depois de rona hau kandidatu an, sira halai fila hotu mai FRETILIN, fou-foun ne’e sira apoiu duni kandidatu seluk, tamba sira hanoin katak, kandidatu FRETILIN nia laiha, maibe sira halai fila hotu ona,” dehan Lu-Olo.

.