“Lere Anan Timur: Politika Fo’er Sei La Influensia Knaar F-FDTL”

.

Jornal INDEPENDENTE - Sesta, 03 Fevereiru 2012

Major jeneral, Lere Anan Timur abertamente deklara katak, politika fo’er husi partidu politiku ka grupu see de’it, sei la fo influensia ba knaar F-FDTL.

Nia dehan, prosesu atu harii metin forsa F-FDTL la’os buat fasil, tamba forsa harii husi FALINTIL ne’ebe transforma ba F-FDTL lori tempu naruk no hasoru dezafiu oioin.

“Bainhira ita transforma forsa da gerilia FALINTIL ba F-FDTL mukit tebe-tebes, tanba ne’e, partidu politiku hotu ka grupu se deit sei la influensia forsa nia knaar nudar lutu nasaun nian,” dehena Maijen Lere, iha selebrasaun aniversariu bad ala XI, iha Centro Convensaun Dili (CCD) horsehik.

Nia hatutan, forsa tenki hala’o servisu ho neutra no labele iha influensia politika, atu nune’e misaun F-FDTL bele susesu sai lutu ba nasaun to’o tinan ba tinan.

Lere fo lembra katak, iha krize politika militar 2006, Forsa F-FDTL hasoru dezafiu boot, maibe forsa tane aas nafatin interese nasional TL.

Tuir nia, atu hetan pas no dame, dala barak nia kolaia ba lider nasaun sira katak, estabilidade nasional TL 50% entrega ba forsa no 50% entrega ba povu tomak.

Nia hatutan, maske oras ne’e sei hasoru difikuldade oioin iha instituisaun F-FDTL, maibe ne’e la’os hanesan impedementu boot, tanba dezafiu hirak ne’e nudar teste atu oinsa lori instituisaun F-FDTL nian ba ema hotu nia mehi no hakarak.

.