Lamentasaun Deputadu Husi Bancada AMP “AMP Nia Ukun Komik, S-1 Asesor Fali Ba S-2 no S-3”

.

Jornal INDEPENDENTE - Kinta, 02 Fevereiru 2012

Vise Prezidenti Bancada ASDT iha Parlamentu Nasional, deputadu Francisco Araujo rekoinese katak, durante ne’e kuaze iha ministeriu hotu rekruta asesor sira tuir sira nia hakarak de’it hodi difikulta ba servisu ka funsionamentu ministeriu.

“Ne’e realidade iha ministeriu ida kuaze asesor sira ne’e la ses husi ministru tenki iha relasaun familia, at liu tan mak, ema ne’e S-1 (Strata satu-red) ba asesor fali ministru ida ne’ebe S-2 ka S-3, ne’e komik,” deklara nia iha Parlamentu Nasional horsehik.

Situasaun ne’e, tuir Araujo dala barak afeta ba orsamentu ministeriu nian, tamba ministeriu sira utiliza osan bo’ot maibe la hatudu rejultadu progresu ruma iha ministeriu sira.

Tan ne’e, Vise Prezidente Bancada ASDT ne’e ezizi ba governu atu kontrola maka’as ba ministeriu tomak hodi identifika ho hatene lalaok knar asesor sira ba programa ministeriu nian.

Nia mos dehan tan, kestaun ne’e ema barak kritika maibe kuaze laiha mudansa.

Relasiona ho preokupasaun ne’e, Presidenti Komisaun Funsaun Publika Liborio Pereira hatete, to’o agora KFP sei buka analiza hela atu iha futuru tenki regula mos asesor nasional sira ne’ebe servisu ba administrasaun.

Iha parte seluk Ministru Turizmu Comersiu Industria (MTCI) Gil da Costa Alves hateten katak,” Assesor ne’e ami nia nesisidade mak ami halo, portantu la’o Funsaun Publiku nia asuntu, ida ne’e evaluasaun ami nia, dehan ami presiza ka la presiza, ne’e ami nia asuntu, la’os Funsionariu Publiku,” nia hateten.

.