KAPREZ 10 Rejistu Iha TR “Mari Alkatiri: Tenki Prontu Simu Rejultadu Eleisaun No Labele Halo Konfrontasaun”

.

Jornal Nacional Diario - Tersa, 31 Janeiru 2012

Kandidatu Prezidenti Republika (KAPREZ) Francisco Guterres “Lu-Olo”, Jose Manuel Ramos Horta, Abilio Araujo no Fernando de Araujo ‘Lasama’, Tersa (31/01) ofisialmente rejista sira nia kandidatura iha Tribunal Rekursu (TR).

Kandidatu Lu-Olo ne’ebe akompania husi Sekretariu Jeral partidu FRETILIN Mari Alkatiri, Arsenio Bano no kuadrus FRETILIN to’o iha Tribunal Rekursu tuku sanulu resin ida no iha prosesu rejistu ne’e simu dereitamente husi Prezidenti Tribunal Rekursu, Claudio Ximenes.

“Ohin hau mai rejistu ofisial iha Tribunal Rekursu, ne’ebe hau lori hau nia kamarada sira mai, liliu ekipa susesu para mai hasoru Tribunal Rekursu nune’e atu rejista,” Lu-Olo esplika.

Total apoiante husi distritu sanulu resin tolu ne’ebe fo apoiu ba kandidatu Lu-Olo hamutuk 22950.

Wainhira husu kona ba, nia garante atu kompete to’o iha segunda ronda, Lu-Olo hatan katak, nia pronto atu kompete ho kandidatu sira ne’ebe iha, maibe atu dehan ba segundu ronda ne’e, so ba iha votasaun mak haree,” Lu-Olo dehan ho hamnasa.

Iha Parte seluk Sekretariu Jeral Partidu FRETILIN, Mari Alkatiri husu ba kandidatu Prezidenti Republika (PR) tenki prepara aan hodi simu rejultadu eleisaun Prezidensial, wainhira lakon iha eleisaun Prezidensial iha loron 17 fulan Marsu mai ne’e.

“Hau hanoin ita tenki prepara aan didiak atu simu, kuandu ita lakon iha eleisaun, tamba povu maka deside, la’os ema ida rua mak deside, hau fiar katak eleisaun sei la’o diak no labele halo konfrontasaun, labele hatun malu, maibe hatudu katak atu sai prezidenti para sai Xefe do Estadu, la’os atu kontra ema ida, ka kontra partidu, ida ne’e la loos,” Mari Apela.

Ba kestaun ne’e, tuir dadus iha Tribunal Rekursu, kandidatu sira ne’ebe mak rejistu ona hamutuk ema nain sanulu, kandidatu sira ne’e mak hanesan, Lu-Olo, Lasama, Jose Ramos Horta, Angelita Pires, Rogerio Lobato, Francisco Gomes, Lucas da Costa, Abilio Araujo, Taur Matan Ruak inklui Maria Angela Freitas (mezmu sei iha verifikasaun lista apoiantes).

.