Kandidatu PR Periodu 2012-2017 “Dom Basilio Hein Hela Programa Hitam di Atas Putih”

.

Notisia Husi TVTL - Kinta Kalan, 02 Fevereiru 2012

Bispo Dioseze Baucau Dom Basilio do Nascimento hateten, povu Timor-Leste hein implementasaun Politika husi Xefe Estadu foun hodi dezemvolve paiz ne’e, tuir Dom Basilio katak, maske seidauk to’o tempo ba kampania maibe kandidatu balun hahu halo promesas barak ba povu Timor Leste.

Atu tama ba prosesu kampania eleitoral ne’ebe sei hahu iha loron 29 fulan ne’e, Politikus barak aprejenta sira nia kandidatura ba Prezidenti Republika iha Tribunal Rekursu atu bele konkore iha eleisaun Presidensial.

“Balu koalia door, hotu-hotu mesak matenek, hotu-hotu mesak ibun boot, politika sira hotu-hotu hanesan, mai ne’e halo promesas oioin, ne’ebe hanesan kandidatu hau basa liman ba sira, enkuantu mais kandidatu iha, ne’e diak liu tan, maibe rai oan be kikoan oan ne’e, kandidatu barak hanesan ne’e, ita ba hili los se?,” haktuir Dom Basilio.

Dom Basilio do Nascimentu afirma katak, ema hotu-hotu iha liberdade atu aprejenta nia kandidatura no bele halo promesas tuir sira nia hanoin.

“Hau sei la hare sira nia oin, hau hein mak sira nia programa, tamba buat lia fuan ne’e hau mos bele promete buat oioin, hau hakarak buat ne’e hanesan ingles foun karik dehan “Hitam di Atas Putih”, ne’eduni ida-idak mai aprejenta buat ne’ebe sira hanoin atu halo, ne’ebe aban bain rua ita bele husu kontas, agora buat ida lia anin ne’e, hau mos bele tur fuma hela sigaru iha uma tutun, hau koalia maka’as no mai koalia loke ibun tun sa’e, nehek mak tama ka, lalar maka tama tan e depois aban bain rua hau bele hateten buat naran de’it,” haktuir Dom Basilio.

Povu Timor tomak hein implementasaun programa husi kandidatu ne’ebe sai eleitu iha eleisaun Prezidensial fulan Marsu.

.