“IMF Preukupa Ekonomia TL Provoka Inflasaun Boot”

.

Jornal INDEPENDENTE - Sesta, 03 Fevereiru 2012

Fundu Monotorizasaun Internasional (IMF) iha Washintong, preokupa ho dezenvolvimentu ekonomia Timor Leste ne’ebe lais tebes, tanba despezas estadu kontinua aumenta kada tinan hodi provoka inflasaun boot sei akontese.

Relatoriu IMF nian fo sai iha loron (2/2) iha Estadus Unidus Amerika (EUA) bainhira Presidenti Republika Jose Ramos Horta deklara hikas nia kandidatura ba PR iha periodu oin mai.

“Nasaun iha ida ne’ebe mak riku mina maibe kiak ne’e, iha dekada ida atinji ukun rasin an hafoin funu naruk, halo tiha ona dezenvolvimentu ne’ebe sustentavel ba estabilidade no dezenvolvimentu nasional,” deklara IMF.

“Orsamentu estadu ne’ebe sa’e, suporta ona dezenvolvimentu nasional forte, maibe inflasaun haksoit dobru dala rua (dua digit),” iha relatoriu Fundu Monitorizasaun Internasional hateten.

Iha relatoriu ne’e mos hateten,” investe iha seitor infraestrutura simu ho diak, maibe planu hasae orsamentu iha tinan hirak mai oin, tenki neneik hodi bele iha balansu ho kapasidade ekonomia no administrasaun,” dehan IMF.

IMF nia predisaun,” Inflasaun ne’ebe sa’e, sei fo todan (membebankan) biaya ne’ebe signifika ba povu kian no mukit,” relatoriu IMF hateten.

Ho informasaun ne’ebe IMF fo sai, Xefe Estadu Timor-Leste Jose Ramos Horta dehan, problema inflasaun la’os de’ot despeza estadu ne’ebe boot, maibe, Prezidente Republika ne’e dehan, problema maka nasaun ne’e sei uza moeda Amerika.

Tanba ne’e, Horta dehan, defisil tebes Timor Leste kontrola inflasaun ne’ebe afeta ba povu kiik nia kapasidade atu sosa.

.