“Francisco Branco: Governu Ida Ne’e Asesor Hanesan Lapangan Kerja”

.

Jornal INDEPENDENTE - Kinta, 02 Fevereiru 2012

Parlamentu Nasional liu husi Bancada FRETILIN, deputadu Francisco Branco ezizi maka’as ba Governu liliu Komisaun Funsaun Publiku (KFP) atu kontrola asesor nasional sira ne’ebe iha Ministeriu sira ho kuantidade bo’ot hodi afeta ba orsamentu jeral estadu.

Foin lalais ne’e mos, KFP rasik deklara ona atu identifika asesor nasional sira iha Ministeriu hotu ne’ebe dala barak ministeriu rekruta tuir sira nia hakarak rasik.

Entertantu, vise Prezidente bancada FRETILIN deputadu Francisco Branco hatete normalmente iha ministeriu ida, uniku ministru mak iha asesor ne’ebe prensidu, tuir criteria hodi aselera planu iha ministeriu, la’os ba departementu hotu.

“Governu agora ne’e, asesor sira hanesan lapangan kerja ka kampo de trabalho ba sira nia amigo,” deklara nia.

Tan ne’e, tuir Branco difisil tebes atu fo rejultadu pozitivu ba governu liu husi osan barak ne’ebe gasta ba sira.

“Kleur ona ami kestiaona, liliu iha debate orsamentu, tanba saida maka rekruta asesor bar-barak ho orsamentu ne’ebe bot ho rejultadu minimu, osan ne’e povu nia, tenki utiliza ho diak,” kestiaona deputadu FRETILIN ne’e.

Nia hatutan tan katak,” Ministeriu Financas ita kumriende, maibe ministeriu balun, lolos la presiza ona, sa tan asesor sira ne’e la’os kualifikadu, entaun afeta ba ministeriu hanesan Primeiru Ministru rasik mos koalia antes ne’e,” deklara nia.

.