Familia Vitima Ezizi Estadu “PM Xanana Gusmao Laiha Resposta”

.

Notisia Husi TVTL - Sesta Kalan, 03 Fevereiru 2012

Familia husi vitima 75 husu ba estadu Timor Leste no lideransa rejistensia atu rejolve no buka vitima sira nia rate, vitima hirak ne’e tuir informasaun katak, hetan oho husi sira nia funu maluk, tamba deskonfia traidor.

Sebastiao do Santos “Wairia” ne’ebe mos hanesan mate restu funu nain hateten, iha tinan 1975 mosu kontradisaun Politika iha ai-laran hodi oho vitima sira ne’e, tamba konsidera sira nu’udar traidor, maibe na hateten vitima hirak ne’e halo funi hodi liberta nasaun no povu Timor Leste.

“Iha 1975, iha kontradisaun politiku ida iha ai-laran, sira konsidera hau nia maun, hau nia liurai Akilis Freitas, Fonsiano dos Santos, Manuel dos Santos Alias “Loriko” Joao dos Santos, sira konsidera traidor reasionariu, sira kaer lori ba dehan katak, estuda politika, maibe hau hatene katak ba estuda politika sira lori ba oho tiha, hamutuk ho ita nia proklamator da independensia, ita nia aman Francisco Xavier do Amaral, sira ne’e konsidera hanesan traidor no reasionari,” dehan familia Vitima ne’e.

To’o oras ne’e, familia husi vitima seidauk hetan vitima sira nia rate no husu ba estadu, lideransa funu nian atu buka no rejolve problema ne’e.

“Ita ema kriatura, iha sentimentu boot ba ami nia familia, karik bele ulun bot no ukun nain sira, atu hatudu sira nia rate ba ami, atu nune’e ami familia halot restu mortais hirak ne’e ba ami nia knua ka iha maon ruma, husu ba lideransa estadu nia no lideransa funu ukun rasik an nian atu iha tempo badak ne’e hamosu consensus nasional ida hatu hametin paz no estabilidade” dehan tan familia vitima ne’e.

Sebastiao hatutan tan katak, maske familia ne’e rasik ezizi ona estatutu husi vitima sira ne’e ba atual Primeiru Ministru Xanana Gusmao, maibe to’o agora seidauk iha resposta.

.