“Estrada Karimbala Besik Kotu, Ekonomia TL Ameasadu”

.

Jornal INDEPENDENTE - Segunda, 06 Fevereiru 2012

Programa Governu AMP ne’ebe loke estrada luan ho laiha kualidade, no udan ne’ebe bot durante ne’e, halo kondisaun estrada iha foho karimbala grave.

Tuir observasaun Jornalista INDEPENDENTE ne’ebe halo viazen ba Batugade hodi partisipa serimonia Inagurasaun Postu integradu iha Mota-ain, batugade, sabadu, (04/02), nota katak udan ne’ebe monu iha area ne’eba halo rai halai, ai no fatuk sira monu hodi taka esttrada no iha area balun ne’ebe besik tasi-ibun besik kotu ona.

Kondisaun estrada ne’e fo impaktu maka’as ba movimentu transporte Publiku no fo mos ameasa ba atividade ekonomia TL ho Indonesia ne’ebe barak mak durante ne’e tama husi Fronteira, Batugade.

Primeiru Ministru xanana Gusmao ne’ebe halao viazen ba Batugade atu inagura postu integradu iha ne’eba, sai sasin ba problema rai-halai ne’e no PM xanana dehan sei fo ameasa bot ba ekonomia TL.

“Ne’e ameasa boot, se rai sira ne’e kontinua halai sei afeita ekonomia Timor Leste,” dehan PM Xanana iha Karimbala.

Iha fatin hanesan, SEOP Domingos Cairo rekoinese katak, rai ne’ebe halai halo nia hakfodak no nia fo ona orientasaun hodi hatuun ekipamentu pezadu husi Likisa, maubara, Balibo, kailaku, iha area foho Karimbala, no Loes atu halo servisu emerjensia nune’e movimentu transporte publiku bele la’o fila fali.

.