“Estanislau Aleixo: Politika Jestaun Governu AMP Fraku, Inflasaun Sei Afeita Ba Povu Kiik”

.

Jornal INDEPENDENTE - Segunda, 06 Fevereiru 2012

Politika jestaun Finanseiru ne’ebe durante ne’e governu estabelese ladun fo rejultadu diak, hodi hamosu inflasaun ne’ebe maka’as halo povu kiik defisil hodi asesu ba nesesidade baziku ho folin ne’ebe kiik.

Deputadu Estanislau da Silva Aleixo husi bancada FRETILIN hateten, durante ne’e Bancada FRETILIN sempre eziji no kritika tamba ho montante orsamentu ne’ebe boot laiha jestaun diak sei kria inflasaun boot iha rai laran.

“Osan sira ne’e la halo investimentu ne’ebe produtivu, gasta arbiru tan, entaun fo impaktu ba inflasaun boot iha rai laran, sasan folin aumenta maka’as, kapasidade kompras tun,” deklara Deputadu Estanislau.

Nia hatutan uluk 0,50 centimo bele sosa buat ruma, maibe agora situasaun deferente, tamba la’os deit impkatu husi depedensia importador, maibe tanba vensimentu ne’ebe mak iha.

“Haree de’it tinan hira nia laran osan barak fakar ba infra-estrutura maibe estrada no ponte kontinua at, laiha produsaun rai laran,” tenik nia.

Situasaun ne’e akontese tamba, laiha politika fiskal husi Governu AMP nia ukun ne’ebe klaru.

“Politika fiskal mak fraku, la’os ita uza moeda ema seluk nian, mak akontese nune’e, tamba kuandu ita iha produsaun maka’as konserteza sei hetan benefisiu husi moeda ne’e,” informa nia.

.