Bancada Opozisaun: Lian Materna Seidauk Iha Estudu Metodologi no Pedologia “Mario Carrascalao: Lian Materna Sei Hamosu Sukuismu”

.

Notisia Husi TVTL - Kinta Kalan, 02 Fevereiru 2012

Deputada Fernanda Borges husi Bancada PUN no Deputadu Estanislau Alexio da Silva husi Bancada FRETILIN husu ba estadu atu fo perioridade hodi dezemvolve lian Tetum, tamba lian maternal wainhira atu hanorin ba estudante tenki liu husi estudu metodologia no pedologia.

Deputadus Bancada PUN no FRETILIN hato’o kestaun ne’e hodi responde konaba planu governu nian atu implementa lian maternal iha prosesu aprendizazen iha Ensino Baziku, tuir Bancada PUN no FRETILIN, diak liu estadu dezemvolve lian tetum hanesan lian ofisial, tamba lian maternal wainhira uza tenki liu husi prosesu estudu.

“Ita nia rekursus limitadu, lian barak tebe-tebes ne’ebe maternal e kondisaun atu hanorin mos difikulta atu promove politika ida ne’e, ita tenki estudu ida ke didiak atu nune’e ita kuandu halo buat sira ne’e, ita halo ho intendimentu ida konaba nia benefisius, ita mos labele difini oin aban ita implementa kedas,” dehan Fernanda Borges.

“Ita nia lian 2 ne’ebe sai hanesan lian ofisial hanesan tetum ho Portugues, ne’ebe to’o agora seidauk dezemvolve didiak, Tetum deit mos koalia arbiru ona, balun koalia lalos, laiha unifomizasaun, entaun agora ita ba dezenvolve tan lian maternal ne’e halo nuza? Agora atu hanorin hanesan lingua de Ensino, ida ne’e tenki hare didiak, tenki halo testu, tenki halo forma profesores, tenki hare ba metodologia, pedagojia de ensino, buat sira ne’e hotu la’os buat ida fasil,” dehan Estanislau da Silva.

Entertantu deputadu husi Bancada PSD Mario Viegas Carrascalao hateten, Ministeriu Edukasaun tenki hato’o esplikasaun konaba substansia husi implementasaun lian maternal.

“Lian maternal ne’e hanesan Indonesia nia karik bolu ‘muatan lokal’, entaun bele teste iha ita nia rain ne’e diak, maibe atu ba implementa iha ensino baziku ne’e buat idake lalos, tamba provoka duni kria sukuismu, halo ita sei fahe malu,” dehan Mario Carascalao.

Hatan ba kestaun ne’e, Cristy Sword Gusmao hanesan Embaixador Boa Vontade ba edukasaun hateten, uza lian maternal hodi hadia ensino aprendizazen.

.