Bancada FRETILIN: Valoriza Demokrasia Ho Kultura Dame Hodi Hametin Paz No Estabilidade “Asaun Tuda Kristy Gusmao AMKV Konsidera Krime”

.

Jornal INDEPENDENTE - Kinta, 02 Fevereiru 2012

Bancada FRETILIN husu Instituisaun Estadu, Organizasaun Politika no Sosiedade Sivil atu kuda no hametin kultura dame iha sosiedade nia leet hodi hametin paz no estabilidade, no mos husu ba ema hotu atu haluha konseitu violensia iha demokratizasaun.

Membru Parlamentu Nasional husi bancada FRETILIN deklara asuntu ne’e, relasiona ho asaun tuda Embaixadora Boa Vontade Edukasaun Timor Leste, Kristy Soward Gusmao husi staf ONG foin lalais ne’e.

Vise Prezidenti bancada FRETILIN, Deputadu Francisco Branco hateten, iha prosesu ne’ebe de’it, importante tebes ka’er metin kultura Timor nian ne’ebe ema hotu mehi atu moris iha dame, paz no unidade.

“Kultura, etika ita nia husi ema ba ema iha ne’ebe de’it, ne’e importante, maske ita iha situasaun Politika ida lahanesan,” tenik nia, iha uma fukun PN horsehik.

Maibe, deputadu ne’e dehan, haree husi kauza asaun ne’e bele iha analiza seluk, tanba karik situasaun ne’e mosu, tanba nudar inan ida sente afetadu bainhira nia oan sira la asesu ba ensinu ne’ebe diak ka kualidade.

Tanba, ba sira asuntu ne’e boot demais, esforsu hotu-hotu halo tiha ona, liu Parlamentu, konsellu Ministru rasik halo rezolusaun hodi kontra, mais politika ne’e kontinua lao, entaun bele fakar sai buat ne’ebe nia espresa,” deklara Branco.

Tanba, nudar umanu, limitasaun nervu ema ida-idak nian la hanesan, hodi rezultadu buat ne’ebe ema hotu la espera, maibe, buat hirak ne’e hotu, liu-liu iha prosesu demokratizasaun tenki fila fali ba ema ida-idak nia hanoin ka desizaun atu hili.

Ba kestaun ne’e, iha parte seluk, Vise Diretor Luta Hamutuk ne’ebe mos nu’udar membru Asosiasaun Mane Kontra Violensia (AMKV), Joaozito Viana konsidera asaun tuda Embaixadora Boa Vontade Edukasaun TL Nu’udar Krime.

Ba kazu ne’e, Luta Hamutuk sei buka hatene, tamba karik problema la dun iha espasu koordenasaun no komunikasaun diak entre esntidade sira relasiona ho lian maternal hodi hamosu problema ne’e.

“”Situasaun la kontrola emosaun bele akontese problema, maibe importante baa mi mak, presiza tau aas valir demokrasia hodi respeita malu,” dehan nia.

Tuir nia, problema ne’ebe akontese sei la fo impaktu ba formasaun igualidade jeneru nia servisu, aviza ema hotu iha klima demokrasia tenki tane aas valor demokrasia.

.