Xefe Bancada FRETILIN Aniceto Guterres “Ki’ak Naklekar Iha TL, Loron Direitu Umanu La Folin”

.

Jornal INDEPENDENTE - Tersa, 13 Dezembru 2011

Timor Leste sempre selebra loron internasional ba direitu umanu kada tinan, tanba TL rasik adopta ona konvensaun barak hodi asegura no garante direitu ema ida-idak nian, maibe lider sira dala barak koalia deit, laiha asaun ruma atu defende povu hodi sai husi kiak no mukit.

Deklarasaun ne’e hato’o husi xefe Bancada FRETILIN, Aniceto Guterres, wainhira selebra loron direitu umanu, iha Parlamentu Nasional segunda horsehik.

“Iha Timor Leste, ita selebra loron direitu umanu nianiha situasaun ida ne’ebe 75% povu sei moris iha kiak no mukit nia laran, tuir relatoriu observasaun Espesial Naoens Unidas foin lalais ne’e,” deklara Xefe bancada FRETILIN deputadu Aniceto Guterres.

Xefe bancada FRETILIN hatutan, kiak naklekar iha fatin hotu-hotu, no 90% joven ho idade 15 ate 34 anus mak laiha servisu atu sustenta nia moris.

“Maske dezenvolvimentu hala’o ona iha Governasaun AMP nia ukun, no iha tinan 4 ikus investimentu publiku hamutuk liu ona 3.5 bilaun dolares Amerikanu, maibe laiha mudansa signifikativu,” Xefe bancada FRETILIN ne’e kestiaona maka’as.

Nia hatutan,” kresimentu ekonomiku “doble digit” no dezenvolvimentu, no hamosu desigualidade social, korupsaun buras iha institusoens estadu.

Nune’e, ema oituan deit maka goza moris diak iha tempu ukun rasik an, ho rekursu povu nia rasik, enkuantu maioria Povu Timor Leste sofre nafatin, ka la hetan direitu atu hetan moris ho digno,” informa.Aniceto.

Xefe bancada FRETILIN mos lembra katak, iha loron 9 de Dezembro liu ba, TL mos selebra loron mundial anti Korupsaun, maibe nia dehan selebrasaun refere ho laran taridu, tanba tuir relatoriu ne’ebe foin lalais fo sai husi Transparancy Internasional, tuir indise persepsaun korupsaun iha mundu koloka Timor-Leste iha lista numeru 143 hamutuk ho nasaun Togo, Uganda, Nigeria, no seluktan hosi lista 183 paizes ne’ebe hetan avaliasaun, hodi konsidera TL nu’udar nasaun ida ne’ebe iha risku bo’ot ba korupsaun.

Ba kestaun ne’e, Prezidente Republika Jose Ramos Horta dehan, diskursu lideransa durante ne’e furak, maibe kuandu povu sei kiak nafatin, diskursu sira ne’e sei la folin.

Horta mos hatutan, ema sira ne’ebe mak moris diak sei la hakmatek bainhira povu maioria sei moris iha kiak no mukit nia laran

.