Uza Patrimonia Estadu Iha Tempo Ferias “Bancada FRETILIN Husu KAK Entrega Ba Ministeriu Publiku”

.

Jornal Nacional Diario - Sesta-Feira, 02 Novembru 2011

Deputadu husi Bancada FRETILIN iha uma fukun Parlamentu Nasional Estanislau Aleixo da Silva husu Komisaun Anti Korupsaun (KAK) entrega rejultadu monorizasaun ba kazu uzus kareta Estado no Kombustivel ne’ebe membru governu no Funsionariu publiku uza iha loron ferias.

Estanislau da Silva hatutan, sala boot kuandu membru Governu no funsionariu publiku uja sasan estadu iha loron ferias, tamba ne’e husu KAK entrega rejultadu investigasaun ba Ministeriu Publiku no prosesa tuir lei ne’ebe mak iha.

“KAK halo tiha ona investigasaun hetan provas ona entaun KAK tenke entrega ba Ministeriu Publiku halo prosesu para lori kazu ne’e ba tribunal, para ema se deit, maka halo ida ne’e bele responsabliza iha julgamentu,” tenik nia.

Nia dehan se deit maka uja sasan estadu iha tempu ferias ke laos loron servisu, merese duni prosesa tuir dalan justica, tamba osan ne’ebe hasai ne’e osan pobu nian no patrimonia ne’ebe iha ne’e riku soin povu nian.

“Ita hare ema uja kareta estadu nian arbiru, tamba Governu la kontrola, buat sira ne’e mos la halo desizaun administrative,” afirma deputadu Estanislau.

Nia dehan durante ne’e, dala barak membru governu no funsionariu sira uja kareta no ba fati-fatin maibe governu la toma medida ruma, tamba ne’e nia husu governu tenki tau atensaun.

.