Transaksaun Trafiku Pessoal ”Patraun Otel Macau Tama Kadeia Tinan 13 Fulan 6”

.

Jornal Timor Post - Tersa, 20 Dezembru 2011

Patraun Otel Macau Guo Guolong Simu Kadeia tinan 13 fulan 6 no nia staf nain rua Hong Lin no Huang Yoyang simu kadeia tinan 13 tamba arguidu nain tolu involve krime trafiku pessoal.

Tamba ne’e, Tribunal Distrital Dili kondena arguidu sira ho kodiku prosesu penal artigu 153, faktus hatudu duni arguidu nain rua seluk halibur osan barak iha sira nia kuartu laran, tuir dadus, osan hirak ne’e mai husi rezultadu trafiku pesoal ne’ebe sira loke.

Alinde ne’e, faktus seluk mak arguidu sira subar vitima feto xineza nain 19 ne’ebe hatama mai hodi halo esplorasaun sexual iha nasaun TL.

Rejultadu operasaun Polisia nian, konsege detekta portatel iha arguidu guolong nia kuartu laran, Portatel ne’e nakonu ho filme atividade sexual entre labarik tinan lima ba leten.

Juiz Singular Antonio Fonseca ne’ebe preside kazu ne’e hateten, “Ami foti desizaun la haree ba koor, maibe, haree liu ba krime ne’ebe arguidu sira pratika, tamba viola ona lei ne’ebe vigor iha nasaun Timor Leste, entaun, todan ne’ebe sira simu tenki bazeia mos lei ne’ebe vigora,” nia dehan ba Jornalista sira iha tribunal Distrital Dili, segunda (19/12).

Antonio esplika, Tribunal husu ba arguidu sira atu selu kustu judicial kada ema ho valor U$300.00 maibe, kustu refere sei selu kuandu rezultadu rekursu fo sai, prosesu refere rejistu iha Tribunal Distrital Dili ho Numeru Prosesu 369/TDD/2011.

.