.
Josefa Parada - SUARA TIMOR LOROSAE
DILI- Fungsionariu hotu-hotu husi Banku Mandiri hamutuk ho movimentu sindikatu iha Timor Leste sei halao asaun grave (mogok kerja) iha loron 19 Dezembru 2011, se karik iha tempu badak nia laran laiha nafatin solusaun husi Manajementu Banku Mandiri kona ba desizaun General Manager Banku Mandiri, Tbk, Dili, M. Yani hodi hapara trabalhador Timor oan nain tolu husi Banku Mandiri. Trabalhador Timor oan nain tolu nebe Banku Mandiri hakotu sira nia servisu mak, Joaquim Gonzaga, Helder D. R. Barreto no Leonardo Bele Bau.
Amiasa ne’e hato’o liu husi konferensia imprensa nebe halao iha Sede Sindikatu Jeral Trabalhadores Timor Leste (SJT-TL), Bemori, Dili, Kuarta (14/12/2011).
Sekretariu Jeral SJT-TL, Almerio Vila Nova liu husi konferensia imprensa hato’o kronologia disputas laboral nebe akontese iha Kompania Banku Mandiri iha loron 16 Dezembru 2011. Almerio hatete disputas laboral ne’e ikus mai rezulta trabalhador senior Timor oan Banku Mandiri, Joaquim Gonzaga hetan despedimentu injustu iha dia 30 de Novembru 2011, tamba halo protesta ba kinerjia manajement nian nebe kontra prosedura internal Banku Mandiri nian.
Kontinuasaun husi disputas refere, katak Almerio, General Manager Banku Mandiri, M. Yani halo presaun ba trabalhador hanesan halo teror psikologia, mutasi no skorsing tuir nia gostu deit wainhira trabalhadores sira ne’e la tuir nia hakarak maske hahalok sira ne’e la tuir ona prosedura internal Banku Mandiri nian.
Iha loron 12 Dezembru 2011, General Manager Banku Mandiri, M.Yani kontinua hapara staf senior Banku Mandiri nian nain rua ho naran Helder Barreto ho Leonardo Bele Bau hosi nia servisu fatin, tamba trabalhador nain rua ne’e hanesan direjente Sindikatu Banku Mandiri hakarak fo sira nia solidaridade ba sira nia maluk servisu nebe hetan despedimentu injustu hosi managemen Banku Mandiri.
“Durante prosesu disputas laboral hahu hosi fulan Augustu 2011 to iha fulan Dezembru 2011, maka Sindikaru Banku Mandiri ho inisiativa diak atu halo aproximasaun hodi minimize konflitu nebe maka akontese, maibe infelismemte lider Banku Mandiri sempere hatudu nia emosional no arogansia hosi lakohi rona ema seluk nia opiniaun, tuir deit nia gostu, maske hahalok ne’e kontra ona prinsipiu fundamentais nebe maka konsagra ona iha Kodigu Laboral no Konstituisaun RDTL,” dehan nia.
Hare ba hahalok ne’ebe General Manager Banku Mandiri, M.Yani hatudu konsidera hanesan grave tebes tamba hahalok ne’e kontra prinsipiu fundamentais nebe konsagra ona iha konstituisaun artigu 50 no 52, kodigu laboral artigu 24, Deklarasaun Universal Direitu Humanus, artigu 23 no konvensaun OIT no 87 nebe maka estadu TL reatifika tiha ona.
Nia hatete, karik hahalok nee maka husik liu maka sei fo impaktu ba povu trabalhador Timor laran tomak atu hadia sira nia kondisaun servisu iha future no wainhira sira koalia maka’as konaba sira nia kondisaun sira nia servisu maka empregador sira sei hapara sira.
Ezizensia
Liu husi konferensia imprensa ne’e, sira hato’o ezizensia hodi husu ba General Manager Banku Mandiri, M. Yani atu re-emprega fali fungsionariu nain tolu nebe maka hapara injustamente la tuir Kodigu Laboral RDTL artigu 10.7 no Konstituisaun RDTL artigu 50.3.
Sira mos husu ba General Manager Banku Mandiri M.Yani atu respeita Lei iha rai laran, respeita Timor Leste nian Konstituisaun no Kodigu Laboral nebe maka garantia no proteza povu trabalhadores nia direitu, no hahalok nebe maka ita bot hatudu hanesan invazaun ba povu Timor Leste nia direitu.
Husu ba Diresaun Nasional Relasaun Trabalhu no Diresaun inspeksaun trabalhu iha SEFOPE nia okos atu halo intervensaun ho seriedadae tamba hahalok refere konsidera hanesan grave tebes.
Iha biban ne’e husu mos ba Parlamentu Naional atu halo intervensaun tamba hahalok nebe arogansia no ditadura hatudu hosi General Manager Banku Mandiri nian Kontra Konstituisaun RDTL artigu 50 no 52.
“Maluk sira nebe servisu iha Banku Mandiri sei fo sira nia apoiu tomak ba ami atu halo grave to’o problema ne’e hetan solusaun. Karik laiha solusaun ami sei lori lona ba toba hodi hein iha Banku Mandiri nia oin, atu ne’e bele hetan solusaun lalais,” dehan Joaquim.
Nunee mos Helder Barreto hatutan tan katak, nia parte la konkorda ho ditadura nebe maka General Manager Banku Mandiri hasai ba sira. “Tamba lajustu no laiha falta, ami mos iha evidensia forte karik nia dehan ami tama servisu la tuir oras maka ami iha sidik jari. Ida nee hatudu katak ami laiha cap merah iha Banku Mandiri, maibe so nia maka buka jeitu atu hasai duni ami hosi fatin servisu,” hatete Helder.
Problema Internal
Hatan kona ba ezizensia ne’e, General Manager Banku Mandiri, M. Yani hatete problema ne’e problema simplis entre kompania ho fungsionariu. Maibe, problema simplis ne’e agora sai ona problema seriu tamba fungsionariu nebe management hasai husi fatin servisu haruka karta ba organizasaun hotu-hotu.
Maske nune’e, katak Yani, management Banku Mandiri sei la muda dezisaun ne’e tamba management foti dezisaun ne’e ho razaun nebe forte no justu. “Odamatan Banku Mandiri taka ona ba funsionariu nain tolu ne’e atu servisu fila fali. Banku Mandiri la bele fo servisu ba ema nebe la disiplina. Organizasaun iha nebe deit iha ninia regra (aturan), bainhira fungsionariu la tuir regra ne’e konsekuensia tenki hetan sanksaun. Maske sira lori problema ne’e ba tribunal mos management pronto atu hasoru,” dehan Yani ba jornalista iha nia servisu fatin, Banku Mandiri, Dili, Kuarta (14/12).
General Manager Banku Mandiri, M. Yani nebe akompanha husi Manager Operasional Banku Mandiri Dili, I Made Tirta katak problema ne’e la influensia ba nasaba nomos fungsionariu nebe servisu iha Banku Mandiri, tamba problema ne’e problema ema ida rua nian, la inklui fungsionariu hotu-hotu. “Los duni, fungsionariu nain tolu nebe management hasai ne’e halo provokativu ba fungsionariu seluk-seluk atu tuir sira nia hakarak atu halo asaun grave hasoru Banku Mandiri. Hau husu tiha ona ba fungsionariu sira ne’e, sira lakohi ikut-ikutan,” katak Yani. len/mik
.
0 comentários:
Enviar um comentário