TR Rekoinese Estrutura Tuan ASDT Nian, Kubu Avo Xavi ho Gil Alves Simu Malu

.

Josefa Parada - Domingu, 18 Dezembru 2011 - SUARA TIMOR LOROSAE

DILI – Tribunal Rekursu (TR) rekoinese deit mak estrutura tuan Partidu ASDT nian tinan 2006, nebee lidera husi Prezidente Francisco Xavier do Amaral alias Avo Xavi ho Sekretariu Jeral, Gil Alves.

TR mos la rekoinese kongresu estraordinariu rua nebee halao ketak-ketak, husi kubu Avo Xavi nian iha 14-15 Novembru 2008, no kubu Gil nian iha 6-7 Agostu 2011.

Desizaun Tribunal Rekursu nee fo sai husi juiz koletivu nebee kompostu husi Claudio de Jesus Ximenes, Maria Natercia Gusmão ho Guilhermino da Silva. TR haree katak estrutura tinan rihun rua neen (2006) maka kontinua validu. Needuni Prezidente Partidu ASDT maka Francisco Xavier do Amaral ho Sekretariu Jeral Partidu ASDT maka Gil da Costa Alves, laiha orgaun ida naran komite sentral.

Entretantu Domingos da Costa, nudar Vice Presidente C.N.J, hateten, ninia parte simu disizaun husi Tribunal Rekursu nebee konsidera kongresu extraordinariu iha 2008 la vale. Tantu husi prte sira nian nebe halao iha 2011 mos vale, tamba nee tenki fila fali ba iha kongresu nebe halao iha tinan 2006 husi estrutura antigu nian, nebee Presidente Partidu ASDT maka Francisco Xavier do Amaral no Sekretariu Jeral Partidu ASDT maka Gil da Costa Alves.

“Ami simu no kumpri desizaun husi Tribunal Rekursu nebee fo sai, tamba nee husu ba militantes ka membrus ASDT, labele rona propaganda no fiar deit ba Sekretariu Jeral Gil da Costa Alves,” dehan Domingos da Costa ba jornalista liu husi konferensia imprensa iha Sede ASDT, Bairro Pite-Dili, (16/12).

Husi kubu Avo Xavi nian, Direitor Sekretariadu Permanente Estrutura Antigu, João Correia, hateten, nia simu disizaun husi Tribunal Rekursu nebee la rekoinese kongresu husi parte rua nian. Importante mak desizaun nee rekoinese nafatin Avo Xavier nudar Prezidenti Partidu ASDT.

“Ami sei tuur hamutuk kompleta kongresu nebee iha sei halo iha tempu badak. Konaba disizaun nee rasik, ami simu ho liman rua tamba laiha tan fatin atu hasae rekursu. Desizaun nee maka boot liu hotu ona,” tenik João Correia via telefone. Jaime do Rosario

.