Susesu F-FDTL ”Kaptura Ro Peska Ilegal Rua”

.

Jornal Nacional Diario - Kinta, 22 Dezembru 2011

Falintil-Forsa Defesa Timor Leste (F-FDTL) parte komponente Naval iha kuarta (21/12), halo operasaun hodi kaptura ro peska illegal rua iha Distritu Lautem.

Entre ro rua ne’e, ida naran CMP Misaquel’s 02, ida seluk seidauk identifika ninia naran, tanba seidauk to’o mai iha portu Naval Hera.

Tuir planu ro ida ne’ebe mak seidauk identifika naran ne’e sei mai iha Portu Dili, iha Kinta (22/12) ohin dadersan.

Ro CMP Misquel’s 02 iha Kuarta horseik Forsa naval sira lori mai tia ona iha Portu dili, inklui sidadaun Indonesia nain lima maka servisu iha ro laran.

Hafoin ne’e forsa Komponente Naval intrega ro ne’e ba servisu alfandega no Policia Imigrasaun hodi lori mai iha sional, Dili atu bele submete ba prosesu investigasaun.

Evidensia ne’ebe iha ro laran mak hanesan, ikan maismenus tonelada ida, inklui tali fiu futun bot, no ikan hiu nia ikun habai iha ro laran.

Ba kestaun ne’e, Xefi Estado Maior F-FDTL, Koronel Falur Rate Laek hateten katak, prosesu ba kazu ne’e sei tuir lei ne’ebe mak iha.

“Hau hanoin suspeiru illegal, laos illegal se kuandu seidauk liu husi prosesu justica, entaun, ba iha justica mak it abele hatene illegal ou lae,” dehan Falur ba Jornalista (21/12), iha Portu komponente naval Hera.

Kona bar o ne’e, Falur dehan, nia parte seidauk hatene los ro ne’e husi ida ne’ebe, maibe iha sidadaun Indonesia mak iha ro laran.

Tuir Falur Rate Laek katak, F-FDTL sei la toba, sei kontrola nafatin no sei kaer feska illegal sira ne’e, tamba,” estadu fo han ami no fo treinu ami para halo servisu, se makan tidur (Han toba) deit ne’e labele, ne’e duni ami tenki ajuda estadu,” dehan Falur Rate Laek.

.