.
Jornal INDEPENDENTE - Segunda, 05 Dezembru 2011
Sekretariu Jeral Partidu FRETILIN Mari Alkatiri hatete, oras ne’e dadaun FRETILIN kontaktu hela ho kandidatu Prezidente Republika balun hodi koalia kona ba eleisaun prezidensial.
“Ami hahu ona prosesu ho sira ne’ebe agora kandidatu ne’e balun, laos hotu-hotu, liliu sira be ita hotu-hotu hatene, mai husi abut ida deit mak lori ita,” dehan Alkatiri, wainhira halo konsolidasaun, sabadu foin lalais, iha Sub Distritu Baguia, Distritu Baucau.
Alkatiri dehan, kandidatu PR ne’ebe mak FRETILIN sei fo apoiu bainhira halo kampania tenki lori bandeira FRETILIN.
“Partidu atu apoiu kandidatu ida, nia tenki lori Bandeira FRETILIN nian, se la lori ita hein deit to’o tempu ba vota mak tuir konsensia ita nian,” dehan Alkatiri.
Maske, FRETILIN kontinua konsulta ho kandidatu PR balun, maibe Alkatiri dehan, FRETILIN iha nia kandidatu natural rasik, tuir estatutu partidu nian.
“Iha kandidatu potensial natural iha ona, mak Lu Olo (Presidenti Partidu FRETILIN) maibe seidauk aprezenta kandidatu,” dehan Alkatiri.
FRETILIN seidauk aprezenta kandidatu ho rajaun, Alkatiri dehan, seidauk to’o tempo atu aprejenta kandidatu.
Iha posiblidade atu apoio kandidatu balun, maibe, Alkatiri dehan, FRETILIN hakarak buka kandidatu ne’ebe mak labele sai opozisaun ba governu, maske nia la’os ema FRETILIN,” signifika ita bele ukun desde governu ukun labele sai fali opozisaun ba governu,” dehan Alkatiri.
FRETILIN fihir hela kandidatura PR balun, tanba Alkatiri dehan, importante mak labele fahe tan povu, tanba kandidatu Prezidente balun buka soke malu, kee kria inestabilidade iha ita nia rai laran.
Maibe, Alkatiri dehan, labele iha kandidatu Prezidenti ida tun tia ba povu nia leet hodi promete kuandu sai prezidenti bele rejolve problema ekonomia, problema saude, problema edukasaun.
“Prezidenti Republika la rejolve buat sira ne’e, ne’e governu, primeiru ministru mak sei rejolve problema hirak ne’e, ne’e la’os kompetensia Prezidenti da Republika nian,” dehan Alkatiri.
.
0 comentários:
Enviar um comentário