Promete Governu AMP ”Komunidade Dili Eziji Ba SE Januario Atu Garante Ahi Lakan Iha Kalan Natal”

.

Jornal Nacional Diario - Kinta, 22 Dezembru 2011

Jose Vieirra, Komunidade ne’ebe hela iha Beto Timor hato’o nia laran susar konaba ahi ne’ebe kontinua mate lakan iha kapital Dili, maske PM Xanana Gusmao no Se Januario Pereira rasik antes ne’e, promete ba povu katak, ahi sei lakan 24 oras no sentral eletrika Hera hahu tiha ona operasaun semana tolu nia laran maibe iha Kapital Dili to’o oras ne’e ahi kontinua mate lakan.

“Ami husu ba Sekretariu Estadu Eletrisidade Sr. Januario Pereira atu bele garante ahi lakan iha natal ne’e ka lae?, tamba agora deit mos loro-loron ahi kontinua mate lakan,” hateten Vieirra ba Jornalista iha Beto Timor, Terca-feira ne’e (20/12).

Nune’e mos Joao Vaz, populasaun husi area Becora, mos haktuir katak, nia senti lakontenti ba ahi ne’ebe seidauk lakan normal, maske governu halo tiha ona promesa iha loron 28 Novembru liu ba katak ahi sei lakan normal.

“Ami kumpriende, ami tenki pasensia, maibe ne’e demais liu, tamba semana tolu tiha ona mos, ahi sei nune’e nafatin, agora atu tama natal tan,” dehan Joao.

Ba kestaun ne’e, Deputadu Inacio Moreira husi Bancada FRETILIN iha uma fukun Parlamentu Nacional, ne’ebe mos hanesan vice Prezidenti Komisaun G hateten katak, konsumidor barak mak sei duvida ho promete estadu nian, tanba situasaun ahi lakan mate kontinua akontese nafatin, depois de seremonia lansamentu iha 27 Novembru kalan.

“Publika duvida hela ho kumprimisiu governu nian nebe hateten, ahi sei lakan iha 24 oras, iha 28 Novembru, maibe realidade to’o agora ahi sei mate lakan hela deit,” deklara Inacio Segumda feira ne’e.

Tuir Observasaun Jornalista katak, iha kapital Dili, hori kalan (21/12) husi tuku 19:22 to’o 20:54 Otl, iha parte Becora deit mos ahi kontinua lakan mate, hanesan uluk molok lansamentu sentral Eletrika Hera.

.