Programa MSS Failla ”Naran Idozus Kontinua Lakon”

.

Jornal Timor Post - Kuarta, 21 Dezembru 2011

Ministeriu Solidaridade no Sosial (MSS) to’o agora seidauk konsege resolve problema naran ferik no katuas sira ne’ebe naran lakon iha lista pagamentu, realidade ne’e akontese iha distritu Manufahi foin lalais ne’e.

Ho kestaun ne’e, terseira idade ne’ebe naran lakon iha lista pagamentu, sira husu ba governu atu labele halo manobra maibe presiza resolve ho diak.

Situasaun ne’e, lamenta husi Chefe suku Betano Satrulinu Tilman komenta, sidadaun ne’ebe iha ona terseira idade, sira hotu iha direitu ba osan subsidiu husi governu.

Hanesan autoridade lokal, nia lakontenti ho naran ferik no katuas ne’ebe naran lakon iha lista pagamentu,” Funsionariu estadu tenki hadia didiak kualidade de servisu atu labele halo manobra ba programa idozu no invalidu,” afirma nia iha intervista foin lalais ne’e, (sesta (16/12) bainhira MSS ba pagamentu idozu sira.

Iha fatin hanesan, idozu ne’ebe naran lakon iha lista pagamentu, kestiaona ho servisu funsionariu MSS tamba antes ne’e, idozu sira ne’e simu ona osan maibe pagamentu agora naran lakon iha lista.

“Kuitadu osan oan ne’e la sufisiente ba moris tomak, hodi ba han deit mos la to’o, maibe funsionariu sira halo fali manobra,” katak fontes ne’e.

Tuir observasaun, iha sub distritu Same, idozu invalidu kuaze 400 mak naran lakon iha lista pagamentu.

Husi observasaun ne’e, bainhira atu halo konfirmasaun Xefi MSS distritu Manufahi, maibe Xefe laiha iha fatin, nune’e atu konfirma ho pontu fokal idozu no invalidu, lakohi komenta, tamba la hetan autorizasaun husi Xefi rejional.

.