Preparasaun Ba Eleisaun 2012 “Tomas Cabral: Sentru Votasaun 630 Preparadu Ona”

.

Notisia Husi TVTL - Sesta-feira, 30 Dezembru 2011

Diretor Nasional STAE Tomas Cabral iha Kinta-feira ne’e iha STAE Kaikoli, Dili, konvoka reflesaun nasional avaliasaun servisu ho ekipa STAE hahu husi funsionariu, Brigada no motorista sira husi distritu 13 hodi hatene lalaok servisu ne’ebe sira hala’o iha terenu, relasiona ho preparasaun ba eleisaun Jeral 2012.

Diretor Nasional STAE Tomas do Rojario Cabral hateten katak, oras ne’e sentru votasaun 630 preparadu ona no ofisial STAE iha distritu tenki informa ona ba komunidade no lideransa komunitaria hodi partisipa iha eleisaun Jeral 2012.

“Stasaun ita iha ona 630, ofisial sira iha distritu ne’e tenki informa ona ba komunidade ba povu, ba eleitor, ba xefe suku sira atu reuniaun hamutuk, hodi informa ba komunidade dehan katak, 2012 ita rejistu iha ne’ebe? Ita Vota iha ne’eba, ida ne’e importante tebtebes,” deklara Diretor STAE Tomas Cabral.

Diretor STAE sublina liu tan, hahu iha fulna Dezembru ne’e, STAE rekruta ona Brigada hamutuk 630, sira ne’e mak sei sai brigada iha sentru votasaun 630 iha teritoriu Timor laran tomak, ne’ebe sei servisu iha Sentro Votasaun hotu no Brigada hirak ne’e sei hala’o servisu ho neutralidade no imparsialidade, tamba sira sei la imvolve iha Partidu Politiku.

Oras ne’e dadaun Komisaun Nasional da Eleisaun no STAE komesa rejistu ona kandidatu ba Prezidensial hamutuk nain 10 no Partidu Politiku hamutuk 24, ne’ebe sei partisipa iha eleisaun Jeral 2012.

.