PR Ramos Horta Konseilha ”FRETILIN No PD Diak Liu Lalika Apresenta Kandidatu Ba PR”

.

Jornal Nacional Diario - Kuarta, 21 Dezembru 2011

Presidente Republika Jose Ramos Horta fo ninia konseilha ba partido politiku, li-liu Partidu bot FRETILIN no Partidu Demokratiku (PD) nebe hanoin atu kandidatu ninia ema ba Presidente Republika iha 2012 mai ne’e diak liu lalika tamba vokasaun Partido Politiku ne’e atu governa.

Chefe Estadu hatete lia hirak ne’e ba Jornal Nacional Diario, Tersa (20/12) iha nia servisu fatin, Palacio Presidensial Aitarak Laran, Dili, wainhira hatan kona ba kandidatu Presidenti Republika iha eleisaun 2012 mai nebe barak teb-tebes.

“Hau nia konselhu ba CNRT ba PD ba partidu sira ne’ebe bot.liliu ba sira ne’ebe hanoin atu kandidatu sira nia ema ba Presidenti Republika, ne’e hau hanoin diak liu lalika, tamba saida? Votasaun partidu politiku nian mak atu governa, atu manan eleisaun iha lejislativa para bele forma governu, maibe partido politiku sira dudu dadaun ona ninia presidenti Partidu tasik mak ba kandidatu ba presidente, lakon, kandidatu Presidenti ne’e ninia krediblidade ne’e kanek ona,” dehan Ramos Horta.

Tan ne’e Horta husu ba Partidu FRETILIN no PD atu lalika kandidata sira nia ema ba Presidenti Republika iha eleisaun Presidensial 2012 mai, maibe prepara an, konsentra an ba eleisaun lejislativa atu bele manan kadeira iha Parlamentu Nasional hodi kaer Governu.

PR Hota hateten tan, FRETILIN kandidatu Francisco Guterres “Lu-Olo” ba Presidenti no Partidu demokratiku kandidatu Fernando Lasama de Araujo mak lakon tan iha eleisaun presidensial mai ne’e, mak ninia autoridade iha partidu laran no iha nasaun laran bele menus liu tan.

“Partidu balu dudu ona ninia prezidenti rasik mak kandidatu ba prezidenti lakon ne’e, entaun kandidatu prezidenti ne’e nia kredebilidade, maturidade ne’e kanek, Maun Lu-Olo lakon dala ida ona, maun Lasama lakon dala ida ona, se lakon dala ida ne’e iha matoridade partidu laran, iha nasaun laran menus liu tan,” koalia PR Horta mos sujere kandidatu ba Prezidenti Republika diak liu ema indepedente.

“Hau nia konselhu nudar ema politiku, respeita partidu politiku sira, hau hatete diak liu, partidu bobot sira ne’e mesmu la apresenta sira nia kandidatura mos lalika apoiu kandidatu ida, sira neutral, hatete ba membru partidu sira katak, ami liberta ita bot sira, membru partidu sira atu vota ho konsensia ba kandidatu presidensial ne’ebe imi fiar liu,” dehan Horta.

Tuir nia, ho maneira sira ne’e la hirus malu ho kandidatu seluk, FRETILIN ka CNRT ka, PSD ka, PD ka, vota konforme imi nia konsensia, ami lideransa labele hatete ba imi atu hili kandidatu ida ne’e ka ida ne’eba.

Nia haklaken ho esperensia no observasaun iha mundu katak, iha mundu eleitoradu barak liu mak vota fo votus ba kandidatu ne’ebe mak independente.

“Eleitoradu ke iha mundu ne’e, hau kuinese mentalidade independenti mak liu, iha rai barak influensia mak mai husi lider sira, iha Timor se lider ne’e sira fiar duni entaun sei tuir nia,” Horta tenik.

Maske nune’e, Presidenti Republika, Jose Ramos Horta mos hatete, Lu-Olo, Taur no Lasama kandidatu potensial sai Presidenti, maibe, Ramos Horta kontinua dehan, kandidatu independente mak diak liu.

Xefe estadu ne’e mos dehan, husi ninia parte seidauk fo sai atu rekandidatu ka lae.

Hau kandidata an ka lae? Desizaun ne’e semana rua tan, maibe mesmuke hau tau ka la tau hau nia naran, hau hateten kandidatu tolu (Lu-Olo, Taur, Lasama) ne’ebe ke hau kuinese diak teb-tebes liliu mak maun bot Lu-Olo ho maun bot Taur Matan Ruak, tamba sira mai husi ailaran tinan 24, luta durante tinan 24 ne’e sira nia karakter ne’e tinan 20,” dehan Horta.

.