.
Jornal Timor Post - Kinta, 15 Dezembru 2011
Prezidenti da Republika (PR) Jose Ramos Horta sei la promulga arbiru Orsamentu Jeral Estadu (OJE) no sei estuda liu-liu orsamentu ne’ebe mak Governu atu impresta.
“Ema balun iha Governu dehan, kuandu lori osan ne’e mai, sira rasik taka hau nia matan atu asina de’it, ne’e la’e, hau sei estuda ne’e didiak, hodi haree ninia konstitusionalidade,” Prezidenti Republika Jose Ramos Horta hateten ba jornalista sira iha Palasio Prezidensial Bairu-Pite, Dili, Kuarta (14/12).
Xefe Estadu konfesa katak to’o ohin loron nia seidauk simu OJE 2012
husi Parlamentu Nasional.
“Hau seidauk simu orsamentu. Hau rona dehan sira (Parlamentu) hadi’a hela, se sira hakarak orsamentu ne’e ezekuta iha 2 Janeiru 2012, favor lori lalais mai hau, hau presiza estuda didiak molok halo promulgasaun,” Horta dehan.
Horta mo hatutan tan, wainhira Parlamentu lakohi sedu lori OJE ba Prezidenti da Republika, nia sei la promulga antes tinan foun.
Esklaresementu husi OJE 2012 kuaze pajina atus ida resin, orsamentu ne’e rasik agora dadaun sei iha hela Comisaun C Parlamentu Nasional ba assuntu Ekonomia, Financas no Anti Korupsaun nia liman, tamba sei hadia numeru orsamentu iha verba balun ne’ebe sala.
.
0 comentários:
Enviar um comentário