”PR Horta: Kansela Data Eleisaun Prezidensial”

.

Jornal Timor Post - Kuarta-feira, 28 Dezembru 2011

Prezidenti Republika Jose Ramos Horta hateten posiblidade eleisaun segunda ronda monu iha tempo paskua, tamba neé, Xefe estadu, sei deside atu eleisaun Presidensial la monu iha 10 marsu 2012.

“Inkontru ohin (horsehik-red) ami koalia kona ba kalendariu eleitoral antes atu lori ba Konsellu Ministru deskute depois sira main koalia ho hau para haree didiak antes hau anunsia data eleisaun prezidensial no ajenda hotu-hotu,”Horta tenik.

Horta hatoó informasaun neé ba jornalista sira iha Palasiu Prezidenti, bairu Pite, Dili, Tersa (27/12), relasiona ho konsultasaun neébe Prezidenti halo ho Primeiru Ministru Xanana Gusmao no Diretor Sekretariu Tekniku Administrasaun eleitoral (STAE), Tomas Cabral kona-ba kalendariu eleisaun.

Nia esplika tan, iha lista pakote prezidenti barak tebes mak halo ona kampana, tamba neé, posiblidade sei akontese eleisaun segunda ronde, Xefe estadu hare katak, segunda ronde nian sei monu iha fulan Abril iha semana santa paskoa nian, neéduni mak Prezidenti la deside primeira eleisaun fulan marsu ba eleisaun presidensial.

Horta informa, governu aprejenta ona kalendariu eleisaun ba nia, nuneé fo espasu ba nia atu estuda nuneé bele publika sai ona iha Jornal Republika, data formal eleisaun prezidesial prezidenti sei anunsia iha tempu badak.

Iha semana hirak liu-ba, hafoin konsulta ho lider partidus politikus, prezidenti Horta deklara katak, eleisaun ba prezidensial iha 10 Marsu 2012.

.