.
Jornal Timor Post - Kuarta, 14 Dezembru 2011
Prezidenti da Republika, Jose Manuel Ramos Horta husu ba Governu atu hadia sasan ne’ebe oferta hela husi UNMIT, tanba iha tinan hirak liu ba sasan hotu estragadu.
Horta koalia lia hirak ne’e, bainhira diriji inkontru altu nivel iha Palasiu Prezidenti, Bairu Pite, Segunda (12/12), kona ba ekipamentu UNMIT nian ne’ebe sei intrega ba estadu Timor Leste.
Ekipamentus ne’ebe atu hela ba estadu maka hanesan Lojistika, kareta, uma no ofisina ne’ebe ho sistematiku no automatiku tebes.
“Ami haree pur-zemplu ofisina no mekanika UNMIT nian iha Caivoli, se mak atu simu sasan hotu nebe modernu tebes no se mak atu halo jestaun, ita labele husik buat bar-barak ne’ebe uluk ita simu, governu la tau matan, laiha mekanizmu no la to’o fulan 6 sasan hotu estraga, tamba ne’e, iha inkontru ne’e, hateten ba Governu para prepara an didiak,”
Xefe Estadu tenik.
Nia hatutan eleisaun jeral iha tinan 2012 besik dadaun ona, tamba ne’e, Governu foun sei hasoru problema, ne’eduni maka buat hotu tenki iha planu ne’ebe maka integradu molok simu ekipamentu hirak ne’e.
Inkontru refere partisipa husi Xefe UNMIT Ameerah Haq, Komisariu PNTL Longuinhos Monteiro, Komodante UNPOL Luis Carilho, Major Jeneral F-FDTL, Lere Anan Timur, Sekretariu Estadu Defeza Julio Tomas Pinto, Vise Ministru Negosiu Estranjeiru, Alberto da Silva.
.
0 comentários:
Enviar um comentário