”PDHJ: Ministeriu Balu Nia Funsionariu Mai Husi Partidu Ida”

.

Jornal INDEPENDENTE - Segunda, 19 Dezembru 2011

Provedor Direitus Humanus no Justisa (PDHJ) Sebatiao Dias Ximenes dezafia Governu liliu Ministru balun deskonfia halo asaun pratika nepotismu no halo diskriminasaun hasoru funsionarius.

Funsionariu Publiku barak mak displina iha servisu fatin tanba prosesu rekrutamentu nakonu ho nepotizmu (liu husi inan sarani no aman sarani).

Sebastiao dehan, lia hirak ne’e bainhira halo reflesaun ba tina ida servisu funsionariu publiku iha Centro Convensaun Dili, ne’ebe mak organiza husi Komisaun Funsaun Publika foin lalais ne’e.

“Rekrutamentu ne’ebe mak ohin loron, sira ne’ebe mak aman sarani iha laran bele pasa, ita sei laiha selesaun ida ne’ebeke diak hodu hili funsionariu publiku ida ne’ebe diak hodi servisu estadu,” dehan Sebastiao.

Ba oin, Sebastiao dehan, rekrutamenti ba funsionariu publiku tenki kria mekanismu ne’ebe uniformanidade.

Nia hatutan tana, Problema ne’ebe akontese iha Ministeriu laran, Sebastiao dehan, Funsionariu balun ho formasaun eskola sekundaria maibe pozisaun tuur iha level tres, konaba formasaun, nia hatutan, seidauk iha mekanismu diak ida atu kria formasaun ba funsionariu, tamba, funsionariu balun serve estadu 2002 maibe to’o agora kontinua ho level tress.

Pior liu tan mak, nomeasaun ba funsionariu publiku, Sebastiao dehan, depende deit ba gostu ministru no sekretariu estadu ida ninia gostu, hodi halo funsionariu ministeriu ida husi partidu politiku ida deit.

“Dala barak ita halo nomeasaun, ita haree liu ba koor politiku husi ministru sira, ikus mai sai funsionariu, ministeriu ida kuaze mai husi partidu ida, se nune’e oinsa funsionariu hala’o nia knaar ho indepedensia no imparsialidade,” dehan sebastiao.

Kona ba displina servisu Funsionariu, Sebastiao dehan, seidauk lao diak, tanba loloos funsionariu tama servisu tuku walu, maibe balun tama tuku sia, maibe kuandu atu simu salariu, Banku seidauk loke, tuku hitu deit Funsionariu sira ba hamriik tiha ona iha Banku oin.

Kona ba bolsu de estudu, Sebastiao afirma katak, laiha planu ida ne’ebeke diak, tanba, funsionariu balun haruka ba estuda rai liur, kuandu fila fali mai, nia fatin funsionariu balun okupa tiha ona.

Parte ida seluk kona ba kareta estadu nia, Sebastiao dehan,” hau husu ba governu ita haree kareta estadu agora oioin deit, kria fali diskriminasaun iha instituisaun balun, diretor estado balun uza kareta prado, hanesan ministru balun uza Toyota, ita halo diskriminasaun ho diretur jeral sira seluk,” nia dehan.

Kestaun seluk, PM Xanana Gusmao mos dehan, estadu no governu bele monu bainhira Funsionariu Publiku ne’ebe sai nu’udar servidor estadu ne’ebe hala’o servisu la ho displina no la ho professional.

.