Partidu Mosu Hanesan Loke Kios ”Amu Basilio: Partidu Barak Demais, Populasaun Oituan Deit”

.

Jornal Timor Post - Kinta, 15 Dezembru 2011

Atu tama ba eleisaun Jeral, partidu ki’ik mosu hanesan loke kios no bengkel, halo lideransa nasaun ida ne’e, parte husi igreja, Estadu, governu no sosiedade civil preukupa hodi husu atu konsolida a’an molok eleisaun.

Bispo Diosece Baucau Dom Basilio do Nascimentu hatete, atu garante paz no estabilidade iha eleisaun 2012 partidu Politiku tenki forma sira nia militante ho didiak.

“Buat ne’ebe hau husu ne’e mak ne’e, lider politiku sira forma sira nia ema atu komprende, sai militante partidu los duni, defende partidu ho laran fuan hotu, maibe keta halua, partidu iha atu serve nasaun,” dehan Amo Bispo.

Partidu atu serve nasaun, amu Bispo dehan, ita hatudu katak, interese nasaun mak boot liu partidu ida-idak nia interese.

Haree ba partidu sira ne’ebe mak barak, Bispo Basilio dehan, Partidu iha Timor Leste barak demais.

“Partidu barak demais, ita nia populasaun oituan deit agora partisu barak hanesan ne’e, mais pronto demokrasia mak hanesan ne’e,” dehan Amo Basilio, Kuarta (14/12) iha serimonia partilha sistema eleitoral ba partidu politiku eleisaun 2012 nian, iha Centro Convensaun Dili.

Entertantu reprezetante partidu politiku hotu ne’ebe mak rejista ona iha tribunal rekursu hato’o sira nia kometmentu hodi kontribui ba paz no estabilidade iha eleisaun 2012 oin mai.

Maibe, sira mos lamenta ho deklarasaun Prezidenti Horta nian, tanba tuir nasaun demokrasia no lei ne’ebe hatu’ur tiha ona katak ema hotu iha kbi’it atu forma grupo ka partidu hodi servisu ba nasaun Timor Leste.

.