“Partidu FRETILIN Partisipa Kongresu Partidu Trabalista Australia”

.

Jornal INDEPENDENTE - Tersa, 06 Dezembru 2011

Prezidenti Partidu FRETILIN, Francisco Guterres ‘Lu-Olo’ foin lalais ne’e, dezloka ba Australia durante loron tolu hodi partisipa kongresu nasional Partidu Trabalista iha nasaun ne’e.

Prezidenti FRETILIN akompania mos husi Adjuntu Sekretariu Jeral FRETILIN, Jose Manuel Fernandes, membru komisaun Politika Nasional, Jose Teixeira no asesor Prezidente Partidu nian hodi atende konvite ne’ebe partidu Trabalista Australia fo.

Situasaun amijade ne’e hatudu mos, bainhira iha fulan kotuk liu ba, FRETILIN hala’o nia terseira kongresu nasional iha Dili, marka mos prezensa lideransa husi partidu Trabalista iha Australia.

Jose Reis hateten, iha politika FRETILIN nian presiza halo kooperasaun masimu iha esterna, entre partidu Politiku sira iha nasaun vizinu hanesan Indonezia, Australia inklui nasaun seluk hodi halo dezenvolvimentu ba partidu no nasaun.

“Atu hametin estadu no nasaun, diak liu hametin uluk relasaun entre partidu politiku, tanba aban bainrua partidu sira ne’e maka jere estadu, nune’e hametinlutan kooperasaun entre nasaun no estadu,” tenik Reis iha CCf, Komoro horisehik.

Buat sira ne’e hotu FRETILIN kontinua esforsu hodi hametin liutan ligasaun, kooperasaun ne’ebe mak iha, hodi garante situasaun tomak entre nasaun ida-idak nian.

.