Parpol ‘Husi Kotuk Dudu’ Konflitu Arte Marsiais

.

Josefa Parada - Kuarta, 21 Dezembru 2011 - SUARA TIMOR LOROSAE

DILI–Konflitus entre grupu arte marsiais, dalaruma la mosu leet deit husi inisiativa membru arte marsiais sira rasik. Tuir Direitor Ezekutivu Asosiasaun HAK, Rogerio Viegas Vicente, konflitus nebee mosu iha fatin-fatin nee, tamba influensa husi lideransa partidus politiku (parpol) balun.

“Lideransa partidu politiku sira tenta uza arte marsiais sira, hodi apoia sira nia partidu politiku rasik. Lideransa arte marsiais sira balun mos involve iha partidu politiku, hodi aproveita oportunidade, uza membru arte marsiais sira atu halo asaun hodi fo apoiu ba politiku partidu nee nian,” dehan Rogerio ba STL iha nia servisu fatin Farol, Dili, Tersa (20/12).

Alende de influensia husi lider parpol sira, Rogerio haree katak, lideransa arte marsiais sira mos ladun hatudu sira nia kapasidade nudar lider maximu hodi kontrola no orienta sira nia membrus. Tamba nee mak mosu bebeik konfrontasaun entre membrus arte marsiais iha Dili laran no distritu sira.

Ho observasaun nee, Asosiasaun HAK ejiji ba governu, atu bolu no fo atensaun ba lideransa artemarsiais sira, atu nunee iha eleisaun 2012 bele lao ho hakmatek. Ida nee importante tebes, tamba eleisaun besik dadauk ona, maibe arte marsiais sira mos oho no baku malu bebeik iha komunidade nia leet.

“Dalaruma bele impata aktividades eleisaun nian. Tamba nee ami husi Asosiasaun HAK ejiji ba governu ou orgaun kompetente atu fo atensaun ba lideransa arte marsiais sira, hodi prevene sira nia membrus atu nunee eleisaun bele lao ho susesu,” sujere Rogerio.

Nia hanoin katak, eleisaun 2012 nudar ezersisiu, atu hili Prezidenti Republika ho Parlamentar. Needuni, nia husu ba juventude no sosiedade sivil sira, atu hametin demokrasia no unidade. Presiza mos bolu atensaun ba lideransa arte marsiais sira, hodi reafirma hikas dame, no kria situasaun seguru ba eleisaun 2012.

Iha fatin seluk, Luis Jose da Silva nudar joven, hateten, eleisaun jeral 2012 nee, eventu ida nebee boot teb-tebes. Tamba nee presiza unidade no dame, tamba nee lideransa sira nebee lidera grupu ka arte marsiais, presiza fo edukasaun ba ninia membru sira.

“Atu nunee ita nia eleisaun bele lao ho susesu no hakmatek, nuner mos ami husu ba PNTL ho F-FDTL fo siguransa maximu ba ita nia eleisaun, atu nune ema labele estraga,” katak Luis.

Iha parte seluk, Tomas Freitas nudar militante Partidu Sosial Demokrata (PSD), afirma, partidu politiku nunka haruka grupu ka arte marsiais hodi halo konfrontasaun iha komunidade nia leet. Partidu politiku nee so eduka, oinsa atu akumula povu ka juventude hodi fo apoiu, laos atu kria konflitus.

Entretantu, Teodoro Sarmento, nudar komunidade, husu ba lideransa parpol inklui lideransa arte marsiais sira, atu eduka nia militantes no sira nia membru. Nunee mos Etelvina Lourdes, hatutan, povu presiza eleisaun nebee hakmatek, atu nunee halao aktividade nee normal hanesan ulu-uluk. Povu a lakohi konfrontasaun mosu, wainhira halao aktividade nebee importante.

Koloka Task Force Ba Areas Konflitus

Relasioona ho problema nebee sempre akontese Comoro-Dili, hanesan foin lalais rezulta membru Persaudaraan Setia Hati Terate (PSHT) 1 mate nain no 3 kanek todan, komunidade ejiji ba PNTL atu halo kontrolu maximu.

Angelina da Costa Freitas, hanesan negosiante Merkado Comoro, husu ba polisia atu kontrola ka halo bebeik patrulla iha area Comoro nian.

“Kuandu sira baku malu ona, entaun halo ami nebee maka faan sasan iha merkado nee, ladun kontenti tamba trauma. Diak liu polisia tenke tau tan postu ida Bundaran Lafatik Comoro nian nee, atu nun’e labele mosu bebeik problema iha bairro Comoro nee,” dehan Angelina ba STL, Tersa (20/12), iha Merkado Comoro.

Iha fatin hanesan, Carlos Soares, hanoin, prezensa Task Force ninian iha area Comoro importante tebes, atu nunee komunidade bele tuur hakmatek hod halao atividades hanesan bain-bain. See joven sira maka gosta kria bebeik problema, komunidade maka tuur la metin.

Husi parte PNTL nian, Adjunto Komandante Interinu PNTL Distritu Dili, Superintendente Asisten Mateus de J. Soares, rekoinse, kazu nebee akontese iha Comoro, hodi rezulta ema kanek no ida mate.

“Maibe sitasaun agora iha Comoro fila fali normal ona. PNTL husi Distritu Dili, kontinua haruka nafatin membru Task Force sira atu halao patrulla ka operasaun ba iha area Comoro ninian, nunee bele buka tuir nafatin ema nebee maka foin lalais nee kria problema iha area nebaa,” Mateus esplika ba STL iha nia servisu fatin, Caicoli-Dili. alm/son

.