FP Sa’e Billaun $8,3 - “Alkatiri: Dependensia Ba FP Jerasaun foun Sei Ki’ak Rabat Rai”

.

Jornal INDEPENDENTE - Tersa, 16 Agustu 2011

Dili-Eis Primeiru Ministru (Atual Sekretariu Jeral FRETILIN), Dr Mari Alkatiri hateten, osan Timor-Leste ne’ebe bot tenki buras iha povu nia liman, atu nune’e jerasaun foun bele hatutan moris iha futuru.

Tuir Alkatiri dehan, estado kuandu dependensia demais osan minarai, jerasaun foun sei kiak rabat rai iha tinan tolu nolu mai.

Tuir relatoriu Fundu Petroliferu (FP) bad ala 24 ne’ebe Banku Pagamentu Autoridade (BPA) fo sai katak husi fulan Abril to’o iha loron 30 Junu 2011, osan fundu Minarai Timor-Leste iha Banku Estadus Unidus Amerika haksoit husi Biliaun USD $7.745,27 ba billaun USD$8.305,80.

Diretor BPA Abrao de Vasconselhos hatutan relatoriu FP ba dala – 24 hatudu katak reseitas ne’ebe simu durante trimester ne’e hamutuk $754,06 millaun ne’ebe kompostu husi kontribuisaun kontribuente sira hamutuk milliaun $304,11 no pagamentu royalty ne’ebe simu husi Autoridade Nasional Pagamentu (ANP) milaun $449,95, husi relatoriu ne’e, tuir Alaktiri hateten, ho montante osan ne’ebe bot la signifika katak, povu no nasaun Timor-Leste riku ona maibe, dehan Alkatiri importante mak oinsa uza osan ne’e atu bele buras iha povu nia liman.

Minarai ne’e sei maran, atu minarai ne’e nia valor la maran, osan tenki buras ba bebeik se la’e ita gasta deit-gasta de’it kuandu minarai maran osan mos semo hotu ona,” dehan Alkatiri foin lalais ne’e, iha CCF Comoro, Dili.

Tuir nia, tenki kuda ekonomia, ida ne’ebe diak iha povu nia liman no tenke la’o tuir ekonomia mundu nian.

“Ita nia Buibere no Maubere, sira presiza sosa supermi, supermi folin mos sa’e, entaun sira mos fa’an sira nia modo ne’e funtun kiik ba bebeik, ida ne’e kona ba asuntu ekonomia, sira mos hatene, aban bainrua sira sai Primeiru Ministru, sira matenek liu AMP,” dehan Alkatiri.

.