.
Timor Post - Sesta, 08 Julhu 2011
C A R T A
Dili-Sei ema matan foun ruma nebe foin mai iha Timor, iha sira nia hanoin katak, ema iha Timor laran tomak mesak anjo hotu, sei ema iha liur ne’ebe nunka mai Timor-Leste iha sira nia hanoin katak politiku nain sira mesak ema ne’ebe iha dignidade no iha moral maka’as, maibe karik sira mai to’ok, saida mak akontese iha rai laran? Realidade ipokritu (kemunafikan) mak nakonu iha rai laran, dala ruma DIABO mos sei diak ituan.
Iha fulan Junu nia laran, deputadus iha PN debate namanas asuntu Quizomba, no to’o iha fulan Junu nia rohan (bazeia ba nutisiariu Timor Post edisaun (08342146/29 Junu 2011/ pajina 3, Prezidente Parlamentu Nasional hasai deklarasaun hodi husu estudantes sira ne’ebe halo dansa Qizomba ne’e nudar autor Qizomba no tenki husu deskulpa ba publiku).
Estrainhu no ironiku tebes! Ami senti hakfodak no laran taridu ho statementu husi PN nian.
Stetmentu ne’e nia sintidu klot tebes tanba Senhor Presidente Parlamentu Nasional konsidera estudante sira ne’ebe festeza hela ba selebrasaun ne’e sai fali autor Qizomba, defaktu ita hatene katak sira estudante “Laos Autir Qizomba”, iha ema autor barak mak halo situasaun rungu-ranga iha rai laran: hahu husi Autor oi-oin, mak hanesan autor koruptor, autor krize 2006 nebe halo povu sofre tan iha ukun a’an nia laran, autor Germo ba protistuisaun no autor barak tan mak halimar ho povu nia vida to’o povu labele asesu ba folin foos.
Ita realistic no mai ita hatudu ita tomak nia honestidade, saida mak hakontese iha rai laran? Ema balun sai Germo ba protistuisaun, ema balun iha feen rua-tolu no feen subar-subar, ema balun naok estadu nia osan hodi hariku sira nia an nune’e halo povu sai sofre (meresahkan Rakyat), pior liu tan; iha Dili laran eziste kleur ona lokalizasaun ba pratika prostituisaun ba Parlamentu Nasional la foti kestaun ruma.
La merese dansa Qizomba ne’e mak kontra moral hodi hatuun dignidadi kultura ema Timor…….Sementara, ita falun metin maun boot sira balun sai Germo ba protistuisaun, maun boot balun iha feen subar-subar, maun sira mos hala’o pratika korupsaun, ne’e mak dehan iha dignidade no hadomi tebes prinsipiu Nasionalizmu no patriotismu…..?
Front konsidera statementu husi Prezidente Parlamentu Nasional ne’e “ABNORMAL”.
Tamba sa Parlamentu Nasional (kebakaran jengot) ba dansa Qizomba? Tamba sa Parlamentu Nasional la koalia sobre folin fos ne’ebe sae maka’as to’o povu labele asesu ona hodi hola netik?
Iha Problema barak mak PN tenke tau matan no laos asuntu Qizomba nebe labele halo ba PN sai Qizomba.
.
4 comentários:
Nusa krize nain sira nebe halo ema mate iha tinan 2006 to agora seidauk husu deskulpa?
Kizomba lia ida ke kiik tenki husu deskulpa. tanba sa?
Diak liu nia husu deskulpa tamba nia troka raan Timor nian ho raan Xina nian. Diak liu nia husu deskulpa tamba nia halo violensia domestika ba nia senhora. Diak liu nia husu deskulpa ba nia papel nudar autor ba kzrise 2006, liliu jovem sira neebe nia haruka tuun mai sunu ema nia uma. Diak liu nia husi deskulpa ba Dr Alkatiri tamba nia kuza nia simu suborno husi Conoc Phillips iha tinan 2004. Diak liu nia husu deskulpa tamba nia lori ita PD tama iha AMP no estraga PD nia naran. Diak liu nia hus deskulpa tamba nia mak husik ministru naukteen PD nian balun nauk osan povo nian no estraga PD. Diak liu nia hanoin husu deskulpa ba buat nee hout, lalika mai halo kampanha politika iha nee.
Ida ne los duni tan deit QUIZOMBA, estudante husu desculpa ba Publico: Nusa PN sira la husu desculpa bain hira ita nia maun boot sira ou lideres politicos sira halo asneiras oi- oin iha ita nia rain timor hanesan: crise 2006,ne halo ema mate barak, no terus e lakon sira nia uma,corupsaun, cria protistuicao,e hanoin deit ba sira nia familia,,,,ida ne hatudo ba mundo katak ita nia lideres paliticos sira seidauk mampu atu bele desenvolve ita nia rain timor. e ida ne Moe bot ida ba ita nia ukun nain sira????
Kisomba laos halo moe ita,maibe estudante timor oan nebe ba ema seluk nia rai e aprende danca rain neba nian i halo danca kultura rai seluk ne nian hanesan feto luron sira nian no mane nebe la respeito feto kolega timor oan. Bainhira joven timor oan ba eskola iha rai seluk ami ina aman fiar katak sira sai embaixador ba Timor Leste. Tamba maun bo'ot sira halo povo moe beibeik hanesan baku fen, tua lanu, no lanu todan bainhira ba rai seluk, no autor krise maibe sei tur iha PN hanesan povo nian uma fukun nia Presidente ho buak seluk tan, ne mak povo moe bo'ot. Hanoin ba ida ne ami inan aman husi imi oan sira ba eskola ira rai seluk holi sai matenek mai fali kaer fali servisu iha uma fukun ka iha governu no bele hasai kaoten sira ne no moe laiha sira ne no sira nebe halao violensia domestika. Tristi duni bainhira ami fo fiar ba joven estudante Cuba nian sai fali foer no halo moe hanesan ne. Maibe ami sei fiar imi bele hakat liu sala ne, no imi labele sukat ne ho sala lideres bo'ot sira nian, hare ba eskola sai matenek hodi fila mai kaer governu atu hasai povo hosi kiak no hosi moras oioin. Hadomi imi no reza ba Maromak imi sei sai matenek no fila lalais.
Enviar um comentário