Responsavel Sentru Saude, Domingos Freitas: “Kondisaun Sentru Súde Laisoru-Lai Grave”

.

Husi: Florindo Coluna - Jornal Independente - Sesta, 01 Julhu 2011

Kelikai-Ministeriu Saude durante ne’e fó konsentrasaun de’it iha capital Dili, tanba ne’e, seidauk tau matan ba enfermeiru balun servisu iha kondisaun ne’e aat iha area rural.

Kondisaun sentru saúde Laisoru-Lai agora dadaun grave hela tanba uma ne’e nia plafon fuhuk no aat hotu ona, Maske nune’e, Sentru saúde Laisoru-Lai hato’o ona proposta ba Ministeriu Saúde, maibé laiha resposta.

Responsavel sentru Saúde Laisoru-Lai, Domingos Freitas Gusmão hateten, kondisaun uma ne’ebé dezde tempo okupasaun Indonezia ne’e komesa aat hotu ona, halo pasiente sira mai trata sira nia moras iha sentru ne’e ta’uk kuandu idan no anin boot.

Relasiona kondisaun ne’e governu liu husi Ministeriu Saude ba halo ona survey iha tinan 2006 no 2007, maibé laiha rezultadu.

“Sira (Ministeriu Saude) atu halo fali konstrusaun foun, maibe to’o oras ne’e seidauk realize,” dehan Domingos, iha sentru Saúde Laisoru-Lai, foin lalais ne’e.

Domingos esplika kaak, durane nia iha enkontru ruma nia sempre hato’o ba Ministeriu Saude, maibé resposta ami hein tinan ba tinan mos la dauk halo.

“Iha enkontru nasional ne’e ami koalia bebeik mais orsamentu sentralizadu iha nasional, sira hatan ba preokupasaun ne’e dehan, atu realize tinan 2009 no 2010, maibe la realija nafatin to’o agora,”tenik nia.

Sentru Saude ne’e, tuir Domingos, atendementu ba pasiente mai husi suku 5 hanesan Laisoru Lai kraik, Laisoru lai leten, Abu, Maluru no suku Unidade 6, sentru saude ne’e iha enfermeiru na’in 3 maka halo atendementu ba pasiente durante ne’e, iha sentru saude ne’eba.

Maibe nain 1 ba ona kontinua eskola iha rai liur, entaun hela deit responsavel ho asistente infermeira maka hala’o servisu hodi atende ba pasiente sira ne’ebe mai halo tratamentu.

Entertantu iha sentru saude ne’e mos laiha fasilidade hanesan kareta hodi tula paave siente grave ba ospitaliza no mos radio komunikasaun mos laiha hodi difikuluta sira nia servisu.

Tanba ne’e, nia subliña katak, kuandu pasiente ruma mak moras grave iha fatin izoladu, infermeiru sira la’o ain de’it ba to’o pasiente sira nia uma hodi fo tulun.

Kondisaun hirak ne’e mak enfermeiru na’in 2 hasoru iha sentru saúde Laisoru-Lai,” dehan Domingos.

.