Reniaun Alagrada 26 Julhu “Igreja-Lider 75 Apoiu Jerasaun Foun Kaer Vida Nasaun”

.

Husi: Eugenio Pereira - Jornal INDEPENDENTE - Kuarta, 20 Julhu 2011

Dili-Tuir Planu iha loron Domingu (26/7) Bispo Igreja Dioseze tolu sei hamutuk organiza reuniaun alargada hamutuk ho lider jerasaun tuan hodi fahe idea ba malu atu suporta ba jerasaun foun, hodi preparadu dezenvolve vida nasaun iha future.

Diretor Komisaun Justisa e paz, Pe Martinho Gusmao hateten, iha enkontru alargada ne’e sei koalia mos kona-ba preparsaun Timor-Leste atu selebra festa tinan 500 Portugues tama Timor Leste, tinan 100 funu Manufahi no tinan 10 restorasaun indepedensia Timor Leste.

“Ami koalia kona ba kontinuasaun husi forum Maubise II ne’ebe sei hala’o reuniaun alargadu ne’ebe sei realize iha loron 26 Julhu iha Palasio Nobre hodi koalia oinsa maka ita iha 2012 sei halo festa lubuk ida hanesan tinan 500 ita selebra Portugues tama TL, tinan 100 funu Manufahi, tinan 10 festa restaurasaun Indepedensia ni ita halo eleisaun jeral 2012, ne’ebe Partidu Politiku sira hakarak hamutuk ho lider historiku sira hamutuk halo konsilidasaun hari ita nia estadu ne’e metin ba futuru,” informa Amo Martinho, hafoin halao inkontru ho PM Palasio Governu, Tersa Horseik.

Nia dehan, ba kestaun ne’e rasik, nia parte koalia ona ho PR Horta ne’ebe fo apoiu maka’as ba enkontru ne’e, atu bele hametin liu tan estabilidade politika no paz iha Timor-Leste.

Tuir nia katak, durante ne’e Igreja Katolika liu husi Amu Bispo Dom Basilio do Nascimento mak lidera inkontru Maubise, tanba ne’e, fo fiar fali ba komisaun Justisa e paz nu’udar komite organizadora hodi prepara diak liu tan inkontru alargadu ne’e.

Padre Martinho hatutan, Jerasaun tuan sira ne’ebe mak sai inisiator ba inkontru ne’e mak, Marí Alkatir, PR Ramos Horta, PM Xanana, Major Jeneral Taur Matan Ruak, Eng Mario Viegas Carrascalao, Vise PM Jose Luis Guterres, Francisco Guterres Lu-Olo sira ne’e, sai nudar lider istoriku ne’ebe deside ona tuir rejultadu inkontru Maubisi.

Amo Martinho dehan, husi inkontru alargado ne’e sei involve diak liu tan lider Politikus historia balun ne’ebe hetan asentu iha Parlamentu Nasional sei tur hamutuk, tanba sei invove mos Amo Bospo Diaseze Dili, Dom alberto Ricardo da silva, Don Basilio do Nascimento no Bispo Diaoseze Maliana, Dom Norberto Amaral hodi haforsa estado TL.

Husi inkontru ne’e sei hametin unidade lideransa Timoroan no povu tomak hodi hakat liu eleisaun 2012 nudar tinan maziku.

“Lider sira sei tur hamutuk ita haree to’o 2012 ita bele haksoit liu ou it abele dehan tinan maziku, ne’ebe sei selebra tinan istoriku maibe ita tenke preparadu didiak,” dehan nia.

Nia hatutan, Igreja Katoliku hakarak liberta nafatin nasaun ho povu, no kontinua kontribui libertasaun povu no nasaun ne’ebe hamutuk ho estado TL.

Ba jerasaun foun, padre Martinho dehan, Igreja identifika tenki iha kapasidade, intelektual, professional, atu kontribui ba nasaun Timor Leste ba voa Dezenvolvimentu,” dehan Amo Martinho.

.