PR Ramos Horta “PEDN La’os Biblia Ba Povu Timor Leste”

.

Jornal Nacional Diario - Kuarta, 13 Julhu 2011

Dili-Presidente Republika Jose Ramos Horta hateten, Planu estratejia Dezenvolvimentu Nacional (PEDN) ne’ebe hetan aprovasaun ona husi Parlamentu Nasional laos Biblia ba Povu Timor-Leste, tanba PEDN ne’e hanesan rezolusaun id abele muda tuir realidade mundu nian.

“PEDN ne’e laos Biblia bele muda, so Biblia maka labele muda, Buat hotu-hotu iha mundu ne’e bele muda tuir revolusaun,” dehan PR Horta iha Konferensia ba Imprensa ne’ebe hala’o iha Dili, Convention Centre (DCC) segunda (12/7), hafoin lansamentu livru PEDN.

Tuir PR Horta katak, governu kuandu halo politika ida boot ba rai ida ne’e tenki buka Consensus ho bloku Opozisaun.

“PEDN ba tinan 20 labele Governu mesak, partidu ida mesak, maibe tenki iha consensus 100%, neduni hau mos hakfodak katak planu ne’e deskute ona iha PN, no rezolusaun sai tiha ona.

Hau hanoin ita bele ho Primeiru Ministru ne’ebe ema ida fuan osan mean, laran luak, ema politiku boot, hau hanoin nia mos bele karik, laos hakiduk tanba rejolusaun ne’e laos lei, entaun bele fila fali ba Parlamentu Nasional, halo debate kuaje fulan ida ka rua, konsulta didiak fali ho opozisaun sira, laos tan ho sosiedade sivil tanba sira rona tiha ona husi Primeiru Ministru,” dehan PR Horta.

PR Horta lakontenti ho atetude bancada FRETILIN iha Parlamentu Nasional (PN) ne’ebe kuandu aprova PEDN halai sai tiha husi Plenaria.

“La divia Bancada FRETILIN abandona PN, mesmu lakonkorda mos labele abandona, kontinua iha ne’eba, bele kontinua depois sira nia direitu la vota nein abstensaun, maibe partidipa laos abandona fali PN,” hirus PR Horta.

Maske nune’e, PR Horta dehan, Bancada FRETILIN iha rajaun para hirus governu tanba dokumentu ne’e foin maka intrega iha loron hira liu ba, iha fim de semana, laiha tempu para estuda, bele lori fulan ida para hotu-hotu bele estuda didiak, nune’e FRETILIN bele konkorda.

Maibe PR Horta rasik fo apoiu 100% ba PEDN ne’ebe PN aprova ona, tanba ne’e refleta duni povu tomak nia hakarak.

“Hau PEDN ne’e PM Xanana fo hau estuda iha fulan kotuk ona, ne’ebe pagina hira iha PEDN ne’e hau hatene hotu ona, e hau apoiu 100% PEDN ne’e,” dehan Xefe estadu.

PM Xanana Gusmao

Iha fatin hanesan Primeiru Ministru Kay Rala xanana Gusmao hateten katak, PEDN ne’e la presiza halo consensus ho Bancada Opozisaun iha PN.

“Se fosse ita moris ho consensus la presiza eleisaun, buat ne’ebe kaer ita maka lei, PEDN hanesan Guia ida atu orienta Dezenvolvimentu TL nian ba oin, PEDN laos Biblia ida permanente maibe PEDN bele muda, PEDN ne’e laos hau nian, laos mos ema ida nian deit, maibe Timor oan tomak nian,” dehan PM xanana iha konferensia ba imprensa ne’e.

Projetu de rejolusaun No.37/II/2011 kona ba PEDN ne’e aprova ofisialmente husi PN ho votus a favor 38, kontra 0, abstensaun 0. Cru

.