PM La Kontente Ona Ho Membru Governu Balun

.

Jornal Independente - Segunda, 04 Jullu 2011 - EDITORAL

Dili-Prezidente Jose Ramos-Horta hateten katak, Primeiru Ministru Xanana Gusmao dehan ba nia katak membru Governu balun laiha kapasidade masimu hodi implementa orsamentu estadi ho diak, PM Xanana la kontenti ho situsaun ne’e.

Reasaun Xefe Governu nian hanesan ne’e la akontese babain, Durante ne’e nia sempre defende deit sira kuandu buat ruma sala, maibe agora nia (Xanana) kritika ona.

Iha pergunta kona ba reasaun ne’e,” Ne’e hanesan etratejia politika ka tanba Xefe Governu preokupa duni vida boa Governasaun nasaun ida ne’e nian?”.

Atu dehan, estratejia Politika ka tanba sentimentu transpatansia nian, ne’e mos la klaru ida tanba Xefe Governu rasik seidauk esklarese didiak.

Keta razaun rua ne’e hotu, tanba, nia hakarak hatudu ba povu katak aliansa ne’ebe kaer governu ida ne’e la dun implementa orsamentu ho diak, deklarasaun ne’e hatudu mos katak programa dezenvolvimentu balun, karik la lao diak ne’e membru sira ne’ebe toma konta ne’e nia

kulpa, laos xefe governu nian.

Entaun iha eleisaun Parlamentu tinan oin mai, povu bele iha ona esperensia hodi hili partidu ne’ebe lidera husi lider sira, ne’ebe sira konsidera halao dezenvolvimentu diak.

Se karik kritika ne’e mosu tanba Xefe Governu preokupa duni kona ba vida transparansia no akuntabilidade iha rai ida ne’e, nusa mak antes ne’e la hasai deklarasaun hanesan ne’e? Sempre defende hela deit situsaun, klaru katak Xefe Governu ida nia responsablidade moral ida mak defende ninia governu, maibe tenki respeita prinsipiu boa Governasaun nian.

Maibe, kalma! PM Xanana iha duni vontade diak hodi hamos sasan sira ne’ebe ladiak iha ninia governasaun laran ne’e maka nia hatudu ona ninia vontade hodi fo apoiu masimu, hodi kria Komisaun Anti Korupsaun (KAK) ne’ebe to’o ohin loron povu seidauk hatene lolos sira nia forsa

masimu hodi defende investiga kazu korupsaun,” kolusaun no Nepotismu.

Entaun Nusa? Xefe Governu lakontente duni ho ninia membru governu balun nia serbisu, diak liu foti asaun seriu ida, lalika hanesan soe issue deit liu husi Media, no membru Governu tomak mos tenke simu kritika Xefe Governu nian ne’e, tanba atu sasan ruma atu lao diak presiza kontribuisaun idea husi ema seluk, kritika hatu hadi’a, Laos atu estraga ba a’at liu tan nian.

.