Osan Menus, Problema Edukasaun La Rezolvidu

.

Husi: Agapito dos Santos - Jornal INDEPENDENTE - Segunda, 18 Julhu 2011

Dili- To’o oras ne’e Ministeriu Edukasaun (ME) seidauk konsege resolve problema edukasaun ne’ebe mosu iha Timor Leste, tanba osan ne’ebe aloka ba Ministeriu ne’e la to’o, dehan Ministeriu Edukasaun, João Cancio.

Nia hateten, hafoin TL hetan indepedensia, Guivernu konsege hadia ona eskola publiku barak, maske barak mos seidauk rejolve, husi total eskola publiku iha TL kuaze rihun 1500.

Ministru Joao dehan, ida ne’e akontese tanba ME la iha kapasidade orsamentu ne’ebe sufisiente atu ezekta tuir planu no programa ne’ebe iha.

Tanba ne’e, nia husu ba komunidade tomak atu kolabora ho apoiu guvernu hodi kontrui setor edukasaun ho diak liu tan iha futuru.

Nia rekoinese katak, iha mos eskola balun ne’ebe harii kedan, iha tinan 1980 no komesa malahuk ona, maibe seidauk iha reabilitasaun ruma ba eskola refere.

Joao Cancio promete katak, ba eskola hirak ne’ebe seidauk reabilita sei lao tuir etapa,” Cancio mos dehan, ho orsamentu estado no apoiu husi duador sira ME sei buka atu hadia infraestrutura baziku hirak ne’e.

Entertantu antes ne’e, Ministru Joao esplika katak kada tinan ME iha orsamentu ba projeitu reabilitasaun eskola hamutuk 50 deit.

Ida ne’e, nia dehan, dook tebes husi tarjetu ME nian, ne’ebe hakarak atu kada tinan hadia eskola hamutuk 300-400.

“Orsamentu la to’o atu resolve problema edukasaun, liu-liu infraestrutura baziku, tinan oin sei propoin (Orsamentu) ba projeitu 80,” Joao promete.

Orsamentu estadu iha tinan 2011 ne’ebe aloka ba ME ho montante miliaun USD$70, orsamentu barak liu ho montante liliaun USD$43 uza ba salariu no vensimentu.

.