Mari Alkatiri : “PEDN AMP nian, FRETILIN sei la usa"

.

Jornal Nacional Diário - Segunda- Feira 18 Julhu 2011

Secretariu Jeral Partido FRETILIN, Mari Alkatiri declara katak Planu Estrategia Dezenvolvimentu Nacional (PEDN), Aliansa Maioria Parlamentar nian, tanba ne’e FRETILIN sei la utiliza planu ne’ebe refere bainhira FRETILIN kaer Governu iha 2012, maske planu refere Parlamentu Nacional aprova tiha ona.

Tuir Eis Primeiro Ministro Dr. Mari Alkatiri katak PEDN ba tinan vinte (20) nian tanba ne’e persiza rona oponiaun entidades hotu hanesan Partido Politikus, Igreja, Sociedade Sivil, Akademika hodi nune’e define prioridades.

“Planu ne’e sasan buat hotu tenke integradu, balu positivu ami sei rekonhese positivu, agora planu estratejiku ida ne’e oin seluk fali, bolu de’it grupo ida mai husi liur hakerek iha planu, selu tan osan bo’ot depois tenta atu fa’an de’it planu ne’e ba povu, planu ne’e nia prosesu sala ona” Declara Secretariu jeral Partido FRETILIN Dr. Mari Alkatiri liu husi konfrensia da imprensa Sesta dia quinze Julhu iha Cede Comite Central Partido FRETILIN Comoro Dili.

Alkatiri hateten planu ne’ebe aprova foin lalais ne’e nakonu ho interese Politiku, maske Primeiro Ministru halo ona sosializasaun ba planu ne’e maibe la fo oportunidade ba populasaun sira atu husu, nune’e ema barak sei la hatene sobre planu ne’e. No nia hateten tan katak planu ne’ebe refere nia parte konsidera hanesan sosa votus, tamba bloku AMP balu dehan momos katak PEDN ne’e planu AMP nian, entaun FRETILIN la simu planu ne’e.

Hanesan Presidenti Komisaun Nacional ne’ebe hakerek Planu Dezenvolvimentu (PND) iha Governu anterior hatete, ema barak la kompreinde husi PEDN ne’e rasik, tanto kestoens ne’ebe mak foti la tau iha PEDN, tamba ne’e nia parte konsidera PEDN hanesan tentativa atu fa’an planu ne’e e PEDN laos konsulta maibe kampanha.

Alkatiri hateten Dezenvolvimentu ba Nasaun importante mak área Educasaun Saude maibe se quando la akompanha ho Dezenvolvimentu Fisiku, entaun aban- bainrua bele iha uma bo bo’ot teknolojia oi-oin maibe ema seluk mak sei kontrola, tamba ita laiha kapasidade, ita la’o lalais demais entaun ita nia kapasidade sei mukit, no ita nia rai nia necesidade bo’ot liu ita nia kapasidade.(Alf)

.