Gil Alves Sei Realiza Kongresu ASDT: “Grupu Xavier Ameasa Sei Blokeia”

.

Husi: Manuel da Silva - Timor Post - Sesta, 01 Julhu 2011

Dili-Kongresu Nasionál Partidu Asosiasaun Demokrata Timorense (ASDT) ne’ebe sei hala’o iha loron 4 fulan Agostu tinan ida ne’e, ameasadu hetan blokea, tamba lideransa partido refere idaidak ho nia argumentu rasik.

Kongresu extra-ordinario ASDT akontese iha 2008 (tinan hirak liu ba) hodi troka tiha Gil Alves nu’udar Sekretariu Jeral, no eis padre João Coreia mak troka sai nu’udar Skretariu Jeral foun.

Mesmu nune’e (Gil Alves) konsidera an nafatin nu’udar Sekjer tanba hein hela kongresu nasional tuir estatutu hateten.

Bazeia ba estatutu, parte Gil Alves prepara dadauk ona atu realize kongresu nasional ne’e.

Maibe, preparasaun ne’ebe parte Gil Alves prepara ne’e hetan reasaun maka’as,” tuir Adjunto Sekretariu Jeral Ilidio Mendonça hatete, estrutura foun ne’ebe eleitu iha kongresu extra-ordinario ASDT nian iha 2008 ho militante distritu 13 sei ameasa no blokeia kongresu ne’e iha fulan-Agustu mai.

Tanba tuir nia, kongresu nasionál ASDT bele hala’o wainhira hetan autorizasaun husi Presidente ASDT, Xavier do Amaral.

“Se kongresu ne’e hala’o mak ami sei movimenta, Militantes ASDT ba kaer no futu nia (Gil Alves) ho nia membru sira ne’ebe halo buat ne’e,” dehan Ilidio ba INDEPENDENTE horseik iha sede ASDT Fatumeta.

Ilidio dehan, Presidente ASDT hasai tiha ona Gil Alves iha kongresu extra-ordinario iha tinan 2008 liu ba, tanba ejizensia militante ASDT husi Distritu Likisa, Aileu no Ermera.

“Gil ami hasai tiha ona husi ASDT tanba ihamomentu ne’eba povu ASDT mak hili nia ba Ministru, maibe insulta fali povu ASDT ne’e beikten hatais sapatu la hatene,” Ilidio haktuir.

Ilidio akresenta, Prezidente partidu ASDT rasik, haruka tiha ona karta ba tribunal rekursu, prezidente da Repúblika no Parlamentu Nasionál, katak ASDT hasai ona Gil Alves husi Partidu.

“Nia (Gil Alves) hanesan ema ne’ebe estres ona, agora partidu barak la’o ona, hanoin iha 2012 laiha ona fatin koalia arbiru, maske ami la koinese tan nia iha ASDT,” dehan Ilidio.

Nia mos hatutan, durante tinan hat (4) ona Gil Alves nunka fo kontribuisaun ba Partido ASDT,” dehan Ilido.

.