FRETILIN Akuza AMP Sosa Votu Ho Material Estadu

.

Husi: Manuel da Silva - Jornal INDEPENDENTE - Sesta, 08 Julhu 2011

Dili-Bainhira kaer ukun, buat hotu bele legaliza maski kontra lei, inklui mos utiliza material estadu nian hodi halo kamoania, situasaun ne’e sai ona tradisaun ba partidu politiku no governu ne’ebe kaer ukun, tanba hahalok ne’e akontese dezde tempo anterior.

Agora dadaun iha uma fukun Parlamentu Nasional, Bancada FRETILIN hasa’e lian maka’as, tanba deskonfia iha membru governu balun, oras ne’e dadaun utiliza material estadu nian hodi aroveita kampania iha tempo konsolidasaun nia laran.

Material ne’ebe tuir loloos tenke fahe ba povu kiik sira ne’ebe kni’it laek, lidera partidu balun ne’ebe kaer poder iha governu nia laran, aproveita hodi fahe ba ninia militante sira, pratika politika ‘hadau fuan’ laos foun ona ba povu iha nasaun ne’e.

Membru Bancada FRETILIN, Deputadu Inacio Moreira deskonfia Ministru balun iha Governu Aliansa Maioria Parlamentar (AMP) lori sasan estadu hodi sosa votus, kritika ne’e hasai tanba laiha definisaun loloos sasan ne’ebe fahe ne’e estadu nian ka privadu nian.

“Hau hakarak husu tok, kona ba fahe trator sira ne’e MAP fahe trator, MED mos fahe trator,” dehan nia ba Vice MAP Marcos da Cruz iha Parlamentu nasional, horsehik.

Nia kestiaona tanba tuir loloos iha dekreitu ruma mak tenki define kompetensia Ministeriu ida-idak nian, atu nune’e Ministeriu ida labele haksoit ba ministeriu seluk nia ‘kuartu’ laran.

“Ami deskonfia iha buat balun ke lao la los karik? Ita tenki kose-kose ba ema para ema bele vota ba ita,” dehan Inacio.

Nune’e, nia mos husu atu governu bele esklarese ba deputadu sira kona ba rezultadu husi fahe trator nian, tanba, dezde uluk to’o agora iha fiskalizasaun ne’ebe mak deputadu sira halo la hatudu sinal pozitivu ruma.

“Trator hira mak fahe ona, no hira mak sei funsiona nafatin no balun sai aat tiha ona, hau hatene, produsaun loloos husu trator sira ne’ebe fahe ne’e nia rejultadu hira ami hakarak hatene loloos,” dehan Inacio.

Hatan ba kestaun ne’e, Sekretariu estadu Agrikultura no Abrokultura (SEAAU) marcos da Cruz hateten, durante ne’e MAP fahe ona trator hamutuk 2.500, maibe seidauk to’o nafatin ba povu agrikultura sira.

“Preokupasaun povu nian mak dehan, sira seidauk simu trator, proposta barak la halimar, trator 2.500 ne’e la to’o duni atu kobre ema agrikultor ne’ebe mais pursentu ualu-nulu resin lima (85),” dehan Marcos.

.