FM Nia Relatoriu Konaba Dezenvolvimentu PNTL

.

Written by Domingos Silva - Thursday, 21 July 2011

CJITL Flash, Dezenvolvimentu Polisia Nasional Timor Leste, iha obstaklu maka’as los. Importante liu atu dezenvolve iha PNTL laran mak Polisia ne’e rasik.

Iha tinan 2006 Instituisaun PNTL ne’e naksobu e Timor oan sira foti kroat ba malu, balun mate no barak desloka ba fatin deslokadus iha Dili Laran.

Tuir Direktur Fundasaun Mahein-FM Nelson Belo hateten Instituisaun PNTL no F-FDTL iha momentu ne’eba la biban halo kontrolu Seguransa tuir mandatu ne’ebe iha, Ikus mai Polisia barak mak viola Regra ordem publiku e la halo tuir Lei no Ordem ne’ebe mak iha.

“Depois krize 2006 to’o agora Polisia Nasional Timor Leste-PNTL hasoru problema barak, tanba kazu barak mak sei pendent” dehan Nelson Belo iha konferesia ba Imprensa kinta 21/7, iha edifisiu FM Balide Dili.

Nia hatutan katak opstaklu rekursu humanus ne’ebe mak PNTL hasoru hanesan promosaun, ekipamentus ne’ebe mak la dun sufisiente, Uza sala ekipamentus e halo Polisia la Profisional wainhira halo sira nia knar.

Nune’e mos Joao Almeida nudar peskizador FM nian hateten ita hare ba prosesu Dezenvolvimentu Polisia Nasional Timor Leste hahu iha tinan 2000- 2006, ita hare katak Polisia Infrenta Problema boot iha Instituisaun nia laran.

Iha tinan 2006 Instituisaun naksobu, infrenta iha Problema social politika Militar ne’ebe elementu PNTL fahe malu, tanba ne’e UNPOL tenke simu responsabilidade iha Timor Leste to’o iha 2009 UNPOL tenke entrega hikas ba PNTL.

Husi prosesu no progresu ne’ebe mak lao iha Instituisaun PNTL nia laran tenke iha rekursu humanu, tanba rekursu humanu inportante teb-tebes iha Istituisaun ida nia laran.

Nia hatutan katak iha promosaun ba elementu PNTL sira, maibe mosu mos lamentasaun husi elementu PNTL ne’ebe la promove.

“La promove tanba tuir peskiza FM nia hetan aktus barak ne’ebe komete husi elementu hanesan kazu Disiplinadus, no la iha kapasidade hodi halao servisu” dehan Peskizador ne’e.

Joao Almeida Informa katak Prosesu Inplementasaun Lei no Ordem iha PNTL nia laran hanesan dezafiu boot ida iha Instituisaun nia latan, tanba kazu ne’ebe rezista iha PNTL nia laran husi 2007-2011 hamutuk 1313 ba kazu disiplinar, husi 1313 kazu ne’e kazu ne’ebe mak taka hamutuk 855, tanba ne’e iha ona indikasaun ne’ebe forte katak iha ona impunidade helik iha PNTL nia laran ne’ebe inplementa lei no ordem.

“FM hakarak husu katak tanba saida mak taka kazu hira ne’e tanba la iha prosesu ne’ebe klaru iha Justisa nia oin” Nia Kestiona.

Iha Oportunudadde ne'e FM mos husu atu imveste Rekursu Humanu iha Instituisaun PNTL nia laran.(*/CJITL)

.