“Estrada Iha Kapital Dili Barak Maka Sei Aat”

.

Timor Post - Tersa, 05 Jullu 2011

Dili-Tinan hat ona no hela tan tinan ida Guvernu AMP kompleta nia Governasaun ba tinan 5 maibe kondisaun estrada iha kapital Díli kontinua a’at.

Tuir observasaun Diario ne’e kona ba estrada ne’ebe aat mak hanesan embaixada Malaysia nia oin, estrada tama ba Bebonuk (Kampung Tuti), aliened iha fatin ne’eba menciona iha mos kondisaun estrada iha Bairo balun iha Kapital Dili nebe sei aat no seidauk iha atensaun husi Governo.

Maski dalaruma Membro Governu no deputado sira liu husi dalan ne’ebe kondisaun a’at.

Simao Gomes nudar komunidade nebe hela iha Bairo Bebonuk aldeia Metin I ba Diario ne’e horsehik iha nia hela fatin hateten estrada parte Bebonuk ne’e halo desde Governu Indonesia nian maibe to’o agora Timor Leste ukun an ba dala 10 ona maibe governu nunka iha atensaun kona ba estrada ne’e.

Maski estrada ne’e dala ruma Membro Governu sira ba halao enkontro iha Hotel Arbiru hare hela maibe nunka iha ekipa husi Governu atu halo survey mos laiha.

“Hanesan Timor oan hau senti tristi oituan, maske Timor iha osan barak maibe estrada deit mos la resolve sasan kiik sira ne’e,” dehan nia.

Entertantu Manuel Soares hanesan komunidade ida mos hateten, foin dadauk ne’e iha kompanhia balun maka komesa hadia ona maibe lahatene loron tuir mai ne’e sira la kontinua halao servisu.

Alinde iha estrada Bebonuk maibe mos iha estrada iha Bairo Bedois ne’ebe durante ne’e komunidade sira kestiaona kona ba rai rahun ne’ebe sae maka’as iha tempo bailoron nia.

Governu Timor leste durante ne’e investe maka’as ba iha Ministeriu Infra-estrutura maibe estrada publiku iha kapital Dili kontinua aat maske estrada publiku sai hanesan estrada ne’ebe dala ruma iha visita Diplomata ruma sempre utiliza.

Sekarik iha estrada kapital Dili deit mos la iha ona atensaun husi Ministeriu Infraestrutura oinsa atu halo reabilitasaun ba estrada iha area Rural sira,” haktuir nia ho tristeza. (teu)

.