EMA KIIK NIA HANOIN NAKONU HO MATENEK NEBE NABILAN

.

Foto, Nelson Miranda

AILEBA deixou um comentário em, "QUERIDA LUCRÉCIA DESTA VEZ METES NOJO! "

Horseik hau ba iha merkadu Hali Laran dader tuku 9:30 deit. To'o tiha iha neba. Hau husu ba tiu balu fan hela lakeru ho fehuk nebe foin hatun husi Maubisse. Hau imprimi tiha ona edisaun online Tempo Semanal nia notisia konaba Gil Alves kontrata Miss World bonita husi Australia atu mai halo promosaun konaba turismo Timor Leste nian.

Hafoin nee hau husu ba tiu ida. Tiu nee aruma hela nia sasan atu fan. Wainhira arruma hotu tiha nia fehuk no lakeru sira nee iha tenda okos, hau hakbesik an ba nia tamba hau hakarak husu nia hanoin konaba notisia nee. Hakarak hatene opiniaun husi ema kiik sira.

Hau dehan ba tiu nee ita mesak ema kiik hotu, entaun oinsa tiu nia hanoin konaba governu gasta osan bo'ot selu ema liur atu halo ita nia rain sai famoso liu tan iha mundo. Tiu nee husu mai hau: "Oan famoso ne'e saida?". Hau mos konfuzu ituan atu esplika ho tetum entaun hau koko ho bahasa indonesia. Hau dehan ba tiu nee: "famoso nee hanesan ho bapa nia lian dehan 'terkenal', halo ema mundo raiklaran hatene liu tan konaba ita nia rain". Tiu nee hatan:"ooohh..nee kaaa...hau hatene ona".

Hafoin, hau lori fali tiu nee ba assunto dahuluk konaba notisia nee. Hau husu tiu nee nia opiniaun. "Oinsa titiu nia hanoin, governu gasta osan ba malae atu halo ita nia rain sai 'terkenal' liu tan".

Hau esplika mos valor osan nian ba katuas nee. Katuas lulun tiha nia tabako no fuma dadaun, komesa koalia no nia dehan: "Oan... maun bot Xanana ne'e hanesan nain bot nebe avo lafaek sempre haraik tulun, avo lafaek haraik tulun ba nia atu lori nasaun nee ba moris diak". Hau rona nafatin.

Depois katuas hatutan tan: "Oan hatene ka lae horseik o nia primo Maulato dehan nia mehi avo lafaek tata mate karau lubuk ida, mesak bokur deit, avo lafaek dehan ba Maulato ho sira iha uma lulik atu labele han karau bokur sira nee, tamba tenki lori tun mai Dili entrega ba maun bot Xanana hodi fahe karau nia nan bokur hirak nee hodi habokur no haksolok povo sira. Maibe oan, agora o lori notisia nee mai hau hare, entaun tuir hau nia hanoin maun bot Xanana ho maun bo'ot sira seluk han mos hotu ona karau nia nan bokur no mos nia ruin, neem husik karau nia ten ituan mai ita para halo netik tukir".

Hau mos hakfodak ituan ho katuas nia istoria nee. Hafoin hau husu tan, tamba saida mak tio koalia hanesan nee. Katuas hatan: " bee oan nia notisia nee mak hanesan provoka los hau hodi konta sai Maulato nia mehi nee. Nee mak hau dehan ba Maulato, loron seluk kuandu mehi fali avo lafaek, husu ba nia atu lalika haruka tan karau bar-barak tun ba Dili se lae kanten sira haleu maun bot Xanana lambiska mos hotu. Ba ita povo sira karau nia ten mos ita la hetan. Oan..o nia maun bot sira iha governu nee mesak kanten no hamlaha deit, sira han hotu karau isin bokur, ruin, to'o nia ten no te mos sira han hotu. Avo lafaek haruka dehan ba fahe karau nia nan ba povo, maibe tamba o nia maun bot sira iha ukun neba kanten liu entaun han hotu kedas karau nan sira nee. Ba ita ema kiik sira nee, karau sira nia nia espirito santo mos ita la hare"!

Hau mos bilan tiha ba katuas nia resposta hirak nee. Hafoin tamba katuas hakarak ba aruma didiak nia lakeru ho fehuk sira, nia husu ba hau: "Oan komprende ona ka lae?"..Agora oan sai husi nee tamba tio atu servisu fan lakeru ho fehuk". Hau mos sosa tiha fehuk fatin ida ho presu $0.25 Centimos. No lao dadaun ba uma ona. Katuas hakilar husi dok: " Hare ba sosa fehuk nee ba han, maibe labele sai maufehuk no kanten hanesan oan nia maun bot sira iha governu!!" Hau mos hamnasa deit. Katuas mos hit liman husi dok ho hamnasa.

Moral husi istoria: Ema kiik nia hanoin nakonu ho matenek nebe nabilan. No nia mensajen mak nee labele sai kanten ba riqueza ema hotu nia hodi habokur deit naokten, belun sira no kanten sira iha poder politiko.

.