Doadores Apresia PEDN, Maibe Kestaun Mak Kapasidade Membru Governu

.

Husi: Jorgino dos Santos - Jornal INDEPENDENTE - Kuarta, 13 Julhu 2011

Dili-Programa lubuk ida ne’ebe hakerek iha Planu Estratejia Dezenvolvimentu Nasional (PEDN) pozitivu, maibe kestaun importante atu halo susesu planu ne’e mak kestaun kapasidade membru guvernu atu ezekuta, dehan Country Diretor Banku Mundial, Ferid Belhaj.

Nia hateten, Planu ne’ebe guvernu trasa bele fo reiseita ba dezenvolvimentu nasaun ne’e, maibe importante maka kapasidade implementasaun husi membru guvernu sira.

“Importante mak mebru guvernu sira ne’ebe halo desizaun final, maibe PEDN hatudu katak sir abele halo ida ne’e, hanesan parseiru dezenvolvimentu, Banku Mundial sei kontinua apoiu Timor-Leste hodi implementa programa ne’ebe mak iha,” deklara Ferid iha inkontru Timor-Leste ho Parseiru Dezenvolvimentu (TLPDM), horsehik iha sentru konvensaun Dili, Kaikoli.

Maske nune’e, nia dehan, Timor-Leste sei hasoru dezafiu balun ne’ebe presiza atu tau-matan hanesan problema dezempregu no menus utilizasaun ba Rekursu Humanu, liu-liu iha area rural.

Prezidente Bank-ADB

Iha fatin hanesan, Prezidente Aziatiku ba Dezenvolvimentu (Asia Development Bank-ADB), Haruhiko Kuroda, hateten, PEDN ne’ebe guvernu aprezenta diak ba povu iha rai ida ne’e, no atu hasae ekonomia iha taxa internasional iha tempo naton, maibe nia sama atensaun mos ba guvernu atu labele halo diskriminasaun iha prosesu dezenvolvimentu.

Tanba nia dehan iha nasaun barak ne’ebe tenta atu dezenvolve an dalabarak focus liu ba dezenvolvimentu iha area balun, ne’ebe la dun estratejiku.

Ba oin, nia dehan, Timor-Leste sei depende ba integrasaun ekonomia azia nian ne’ebe sei lidera husi seitor privaduhodi bele sustenta dezenvolvimentu.

“Imi nia futuru defende ba integrasaun Aziatiku nian,” dehan nia.

Tan ne’e, Prezidente ADB husu ba guvernu Timor-Leste atu investe maka’as iha infraestrutura, capital humanu no inisiativa ba kperasaun regional atu aproveita no simu vantazen husi oportunidade ne’ebe iha.

“Ami hakarak haree no sei akompanha nafatin saida maka ita boot sira tau bele implementa ho diak,” dehan nia.

,