Delegadu atus lima rua nolu resin hat ba kongresu FRETILIN

.

Jornal Timor Post - Sabado, 23 Julhu 2011

Dili- Partidu Frente Revolusionario Timor Leste Indepedenti (FRETILIN) konfirma ona katak, partisipante ba kongresu Nacional bad ala tolu setembru tinan rihun rua sanolu resin ida, hamutuk nain atus lima rua nolu resin hat, ne’ebe eleitu liu husi konferensia Distrital.

Informa Adjunto Secretariu Jeral Partido FRETILIN Jose Reis ba Jornalista, iha kinta loron rua nolu resin ida Fulan Julhu iha Sede Comite Central FRETILIN Comoro Dili.

Jose Reis informa mos delegadus efectivu no delegadus suplentu hamutuk ne’en nolu resin lima. “ Kongresista sira mos sei propoin lista ba membru Comite Sentral FRETILIN.

Antes ne’e Presidenti Partido FRETILIN Fransisco Guterres Lu-Olo iha Konferensia Distrital Dili hateten, Kongresu Nacional Partido FRETILIN atu hili orgaun sentral ne’ebe hanesan Comité Sentral FRETILIN, karik hamutuk nain ne’en nolu resin lima no kongresu ne’e mos sei hili orgaun sira seluk.

Nune’e mos Secretariu Jeral Partido FRETILIN Mari Alkatiri hateten preparasaun ba terseiru kongresu Nacional la’o nafatin hodi prepara mos FRETILIN manan iha Eleisaun Jeral no Eleisaun Presidensial iha tinan rihun rua sanolu resin rua. “ ita tenke prepara an didiak, hau hatene to’o kongresu ne’e atu fo pasu ne’ebe fasil, maibe hili membru Comite sentral sei luta bo’ot nia laran. Ita hakarak dois mil doze to’o dois mil deza seis mak comite Central ida ne’ebe dinamiku tebes. No lidera duni prosesu tomak atu ita hili didiak” Mari declara iha Konferensia Distrital Dili.

Jose Reis mos informa, Komisaun Nacional Programa Organjasaun (KNPO) ba eleisaun direta programa Partidu FRETILIN presiza urnas husi STAE atu hato’o semana ida antes Eleisaun. Eleisaun direta ne’e sei halo iha loron rua nolu fulan Agustu tinan ida ne’e. Prensidenti KNPO ne’e hateten komisaun Organizadora Eleisaun presiza urnas atus hitu atu distribui ba Estasaun votu iha Timor laran tomak.

Kona ba preparasaun Jose Reis dehan iha ona reta final. “ preperativu lubuk ami halo ona, ba Eleisaun direta, agora ami prepara material ne’ebe sei uza ba iha Eleisaun no distribui ba Distritu

sira.

Preparasaun seluk mak organiza estasaun votu iha baze no numeru estasaun votus ne’ebe hamutuk atus ne’en hat nolu resin walu, Sei iha mos livru reinskritus. “ Ami determina ona loron to’o tolu nolu resin ida Fulan Julhu tinan rihun rua sanolu resin ida, atu halo listas adisional atu hatene lolos numeru total hira mak atu presiza, ami produz ona Kadernu Eleitoral balu,” Presidenti KNPO dehan.

Iha Suco ida tenke iha estasaun votu ida, tamba iha Suco atus hat hat nolu resin rua mak iha Timor laran “ Fatin ne’ebe mak militante barak, tenke iha estasaun votu barak” Nia esplika.

Hanesan publika tiha ona, kandidatu ba Presidentu do Partido no Secretariu Jeral Partidu FRETILIN uniku mak pakote Fransisco Guterres Lu-Olo no Mari Alkatiri.

Antes ne’e Komisaun Organizadora anunsia ba militantes sira kona ba rejitrasaun kandidatura, ne’ebe loke to’o loron rua nolu fulan Julhu tinan rihun rua sanolu resin ida. Maibe to’o kalendario remata iha deit pakote uniku Mari-Lu, nune’e Eleisaun ba lideransa FRETILIN fulan Agustu oin mai hili de’it pakote uniku ne’e. jXn

.