Vise Ministru: " Governu Faila Iha Infraestrutura”

.

Husi: Agus dos Santos - Jornal Independente - Kuarta, 01 Juñu 2011

Dili-“Vise Ministru Infraestrutura Jose Manuel Carrascalão rekonese governu ne’ebé nia hola parte faila duni iha dezenvolvimentu infraestruktura, inklui Estrada sira iha Timor-Leste.

João dehan durante governasaun AMP frakeza bo’ot ne’ebé infrenta mak setor infraestrutura tamba atrajadu liu kompara ho setor sira seluk.

Nia hateten governu iha duni planu atu halo dezenvolvimentu infrastruktura Estrada nian maibe la lao susesu tamba tempu badak.

“Hau hare’e buat ne’e atrazadu, iha planu maibé atrazadu uituan,”Joao dehan, ba INDEPENDENTE horiseik.

“Seluk bele lao uitoan maibe infrastruktura ita hare’e frakeza bo’ot”.

Xefe Komisaun G Parlamentu Nasionál, deputado pedro da Costa Martires, dehan ninia komisaun hetan liu husi fiskalizasaun katak kuaze Estrada timak iha Timor-Leste a’at.

“Iha fiskalizasaun komisaun nian ami identifika projeitu barak nebe halo 2010 liu husi projeitu PDD barak mak a’at fali ona, Udan ne’eb’e la fo fatin ba kondisaun Estrada,”Pedro, ne’ebé mai husi CNRT ne’e dehan.

Nia hatutan situasaun ne’e akontese fila fali tamba antes halo konstrusaun ka halo Estrada ruma la halo estudu ne’ebe sufisiente.

Entertantu, ONG Mata Dalan Institut nia kordenador Peskizasaun, Elio Dias dehan ninia organizasaun hetan katak kuaze infrastruktura ne’ebé governu halo laiha kualidade.

Nia dehan projetu sira laiha kualidade tamba governu la seriu halao serbisu ho diak.

“Politika diak, ita hare’e koalia barak liu, maibe nia implementasaun ne’e mak laiha, entaun koalia deit, orsamentu bo’ot maibe Estrada kontinua a’at,”Elio dehan.

.