UNPOL-PNTL Asaltu Komunidade Nia Uma

.

Josefa Parada - Sesta, 10 Junhu 2011 - SUARA TIMOR LOROSAE

DILI—United Nations Police (UNPOL), hamutuk ho Polisia Nasional Timor Leste (PNTL), Sesta (10/6), tuku 5:20 dader OTL, amiasa hodi asaltu no estraga moru husi Filomeno Melo Riberio alias Taruto nia uma, iha area Bairo Pite, Aldeia T.A.T, hahalok ida ne’e hatudu katak povu sei lakon konfiansa ba PNTL.

Filomeno Melo Ribeiro, nudar vitima ba asaun ne’ebe mai husi membru PNTL, ba Jurnalista katak, bainhira PNTL ho UNPOL atu mai kaer nian oan mane, Carmo Adriano Melo Roberio, tenke ho disiplina, no tuir prosedur ne’ebe iha.

“Hau nia oan halo sala ou baku malu iha liur, ka krimi ruma karik, Polisia tenke fo hatene uluk ami, bainhira diskunfia katak nia involve, ami la satan netik nia atu ba iha Polisia, maibe tenke mai ho dignidade, kalma. Bainhira UNPOL ho PNTL maibe sae deit ema nia moru, estraga uma, sa tan tama iha kalan hodi pistol amiasa hau nia oan no hau nia feto foun balun ne’ebe sei isin rua hela.”

Nia hatutan “Ami laos terorista atu nune’e PNTL sira mai asaltu ami iha kalan bo’ot, bainhira hau nia oan maka halo sala ka krimi ruma mai buka maka nia, labele amiasa ema ho pistol. Depois amiasa tiha, lori tan Xanana nia naran katak, Xanana maka haruka, Polisia atu mai kaer hau nia oan,” hatete Filomeno alias Taruto iha Bairo Pite.

Nune’e Xefi Suku, Bairo Pite, Joao Baptista Belo, ho Xefi Aldeia T.A.T, Junior de Jesus Baros konsidera katak hahalok PNTL ho UNPOL halo ba iha nia komunidade moral ida ne’ebe atu eduka povu.

“Ami konsidera katak hahalok ida, hahalok ne’ebu uluk military Indonezia halo ba povu Maubere nian. Sa tan bainhira sira atu mai halo kapturtasaun ba iha hau nia komunidade laiha koinesementu ida baa mi,” hatete Joao.

Nia reforsa tan katak, knar Xefi Suku ho Xefi Aldeia hanesan liman ain governu nia iha baze, ne’eduni bainhira atu halo atuasaun ba iha kualker tempu, tenke iha koinesementu, labele mai asaltu povu hanesan terorista. Oscar Salsinha

.