UNMIT Husu Deskulpa Ba PM Xanana, Lasama : Ita Simu Deskulpa no Fo Perdaun

.

SUARA TIMOR LOROSAE - Kinta, 09 Junhu 2011

DILI-Prezidenti Partidu Demokratiku (PD) Fernando Lasama de Araujo, atual Prezidenti Parlamentu nasional hatete hanesan ema moris ka Ema kriatura tenki fo perdaun ba sala nebe UNMIT halo, hodi hakerek relatoriu nebe fo sai iha publiku katak PM Xanana maka sai Obstaklu ba Dezenvolvimentu iha rai nee.

“Emjeral hau nia reasaun primeiru kedan ba relatoriu ne katak hau la kontenti no hau kondena relatoriu ida nee. Hau hanoin katak se sira rekoñese katak buat nee sala hau hanoin Povu no lider sira Timor oan mos prontu atu fo perdaun no aseita desde que ita nakloke ba malu, katak buat ida nee ami halo eru ida,Tanba laiha ema ida maka sempre halo sala deit,”hatete Lasama ba Jornalista iha Komferensia ba imprensa nebe halao iha Sede Partidu Demokratika (PD), Kolmera, Kinta (09/06).

Prezidenti Lasama hatutan Depois Nia senti ofendidu bainhira sira (UNMIT)dehan katak lider ida hanesan Xanana nee maka trava fali Demokrasia no sai fali obstaklu ba Dezenvolvimentu. Hanesan Timor Oan Katak Lasama la masuk akal.

Deputadu Bankada opozisaun Fretilin Parlamentu Nasional (PN), Francisco Branco antes nee, konsidera klarifikasaun nebe UNMIT fo sai ona iha Publiku nee Ema Timor oan ida nebe involve iha servisu halo dokumentasaun maka hatoo nia opiniaun pesoal no interese Partidaria hanesen atu soran Timor oan.

“Klarifikasaun nebe UNMIT fo katak Timor oan nee maka halo estetmentu ida nenee, hau hanoin hanesan soran fali ita Timor oan. Nee hau hanoin ladiak ,” hatete Depotadu Branco ba Jornalista iha Uma Fukun Parlamentu Nasional (PN).

Maibe iha parte seluk reprezentante Povu nee konkorda ho avaliasaun normal nebe sira (UNMIT) halo, tanba tuir Branco katak hanesan Timor nia Parseiru sira tenki halo avaliasaun ba situasaun Real neebe akontese iha Nasaun ida nee. Terezinha da Costa

.