“Unidade AMP Hahu Mamar…!!!”

.

Jornal Nacional Diário - Segunda, 20 Juñu 2011

Dili-“Ikus-ikus ne’e mosu deklarasaun kritiku sira iha bloku AliansaMaioria Parlamentar (AMP), lahatene, karik ne’e mak demokrasia?Normalmente governasaun ida, hetan kritiku husi Partidu opozisaun, ba lalaok governu ida nian.

Kritika efektividade no efikasia governu nian, planu, programa no kualidade projetu estadu ne’ebé governu fo ba seitor privado sira ezekuta, Realidade Governu AMP pelo kontrariu, aliende hetan kritika husi opozisaun, Partidu Bloku AMP fila kritika malu.

Se ita lembra deklarasaun Prezidente Partido Demokratiku (PD) nudar mos Prezidente Parlamentu Nasional nebe forma bloku Aliansa Maioria Parlamentar (AMP), kritika Bloku AMP rasik katak programa AMP la lao tamba hanesan “naan ten ne’ebé dada ba mai”.

Agora mosu tan deklarasaun seluk husi Primeiru Ministru, Nudar Presidente Partidu CNRT, Xanana Gusmao soe lia fuan katak, “Ministru sira matan osan” no la halo servisu ho diak.

Kritika sira ne’e públiku konsidera ‘ulun kritika liman no ain’, Presidente Parlamentu, Lasama kritika AMP nebe sira rasik forma, Primeiru Ministru, Xanana kritika ministru nebe nia rasik hili husi partidu bloku AMP, maibe dehan ministru sira matan osan, no la halo servisu diak.

Kritika sira ne’e normal, maibe oinsa ho akordu formasaun bloku ne’e? karik bloku ne’e la kesi akordu ruma? Tamba deklarasaun politiku no argumentu politika sira hanesan ne’e hatudu katak “fase ropa foer iha Aliansa nian” iha Públiku, ne’ebé lolos ladevia akontese.

Atu koalia tan saida, se ukun nain sira ne’e mak koalia ona hanesan ne’e, la presiza kritika husi partido opozisaun mos AMP rekonese ona sira nia frakeiza ba publiku, ne’e hatudu katak unidade AMP komesa mamar.

La hatene tamba sa? Karik ida ne’e trik politika foun atu partidu iha bloku laran ne’e fase liman, soe sala ka foer sira ne’e ba ministru sira nia leten, no fo sala ba bloku aliansa ne’e rasik? La hatene los.

Los duni vida AMP hela deit tinan ida, Julho 2012 ita iha ona governu foun nebe sei nakonu ho duvidas, partido politikus sira, tantu partidu ukun no opozisaun, dadaun ne’e buka hakarak sai santu hotu, hakribi diabu, maibe fiar ba partido ne’ebé ohin loron konsidera santo ne’e, kaer ukun bele sai diabu, ne’e normal no ne’e mak ezizensia politika.

Ita Hein.

.